鍾意扮鬼扮馬嘅蘭桂坊之父盛智文，嚴正宣佈自已唔再扮「鬼」喇。唉！作為一個咁搞鬼嘅人，唔再扮鬼，真係嘥咗。盛智文同八方澄清，佢嘅意思係，唔再保留加拿大公民嘅鬼佬身份，即世投胎做「人」咁啫，大家唔使戥佢可惜。
盛智文係喺上星期正式攞到香港特區護照，喺護照未到手之前，佢做咗一日無國籍嘅孤魂。點解心血來潮做個勇敢中國人？盛智文話自己喺香港住咗卅幾年，過去十年都冇返過加拿大，連仔女讀完書都喺香港生活，香港就係老家。不過盛智文嘅家人仍然保留加拿大國籍，情況同好多高官一樣。盛智文就話冇諗過做官，不過若然有人搵佢做人大政協，佢都唔拘咁話。