今年嘅亞姐經過多輪甄選，一班外國準亞姐陸續嚟到香港集合，4位嚟自韓國、日本、台灣、新加坡候選亞姐抵港，噚日4位外國候選亞姐跟5位香港賽區候選亞姐喺大埔總台見傳媒。
幾位外國佳麗都相當面熟，十足香港明星相，其中來自韓國24歲7號朴妤抮，無論外貌、身形都極似後生版黃麗梅（May），相信近日同May姐傳不和嘅張家瑩喺亞視見到朴妤抮都會即刻頭耷耷叫聲May姐，不過朴妤抮就話唔識May姐，但係就好想見吓佢，當記者同佢講佢好似May姐，佢笑住用普通話講：「真的，我高興嗎？」
黑girl參戰
另外嚟自日本8號齊藤未知，望落去好有香港名模陳嘉容嘅氣質，尤其係不知記者講乜，然後儍笑個樣，真係好鬼似！齊藤未知嚟香港之前右眼開始結膜炎，搞到好似被人打腫隻右眼咁樣，齊藤喺日本係做演員，原來佢參與演出過套日劇叫做《花樣男子final》。而台灣代表9號賴琳恩好有女人味，但係原來佢喺台灣之前係黑girl成員，個名叫琳恩，佢話：「我是第一次參加選美會，台灣比較少這類型比賽，公司問我有沒有興趣來，我就來了！」