換機熱潮　$2,800掃二手HDTV

幾個月前奧運檔熱換高清，今日卻熱換二手高清！市道差，豪客都閂水喉，聽到大型電器連鎖店的售貨員朋友話靜過鬼，豪花幾萬蚊換部高清電視的情況買少見少，難怪老字號都關門大吉。無錢？甚麼都變得有可能！逛鴨寮街買二手平電視，係一幅睇餸食飯的港人寫照。

記者：陸俊雄
攝影：陳盛臣

換機潮早已醞釀

到鴨記一轉，見有專賣二手電視的店舖，多貨多到放出門口。負責人聲哥看透世情咁話：「其實奧運時已經有大批人換高清，新電視到，舊嗰部一定要人搬走；咁就試試收機返來賣二手，賣吓一部又一部，發現原來有市場，加上呢個時候個個縮皮，香港人最識睇餸食飯。」

■聲哥話，金融海嘯下實有人執平價二手貨。

FullHD數千起

現時二手店內最好賣係42"外置機頂盒的款式，用咗約兩年，須知一部LCDTV或Plasma起碼有7-8年使用年期；新舊交替，反映港人前排過得幾富貴：「基本大部機都係HDReady（1366×768），好些更是FullHD（1920×1080）；不過最搶手都係內置HDMI機款，三幾千買部二手42"擺喺房打PS3，係吸引好多後生仔客落嚟逛嘅一大原因！」

■售貨員話，顧客主要係20至40歲嘅男士。

■除咗HDTV，舊式CRT亦有大量回收。

收機畀番錢你

相信好多人買新機時都試過，叫送貨師傅順手抬走埋部舊機，不過預了被屈一百幾十茶錢，實在所難免，但聲哥幫人搬機之餘仲畀番錢個客，算係真金白銀買入：「我哋有專車上門收機，自己打上嚟嘅散客又有，連鎖店搵我哋幫手收亦有。」有人幫手清理仲有錢收，當然情願，所以也解釋到何解來貨一地都係。

二手保養半年

正常人買二手機，也是驗屍咁驗兼問長問短，聲哥話：「我哋上門收都係一樣，畀幾多錢個客好難講，取決於Condition好唔好，有無遙控器等。」港人都幾貪新忘舊，眼見店內有些更連保養期都未過，價錢當然貴一點；保養期已過的，聲哥則會包半年：「買的話任你驗，有時機身花咗，個客都會接受，因為大家畀得咁嘅價錢出來都預咗。」

小心中招

無論新機或二手，除咗例牌要Check光點、死點之外，二手機其實仲可能經人為改裝，即所謂改換零件嘅「鬼機」，輕則出現閃畫面、無故熄機問題，重則隨時產生過熱甚至燒膽，貪平買二手都係小心啲好！