劉德華噚日同佢設計嘅一對寶貝Andox同黑仔，出席喺銅鑼灣舉行嘅「麥當勞叔叔之家慈善基金日」記招，一齊做善事，華仔噚日着嗰件恤衫都繡有Andox個樣，問華仔係咪想將佢哋商業化推出產品？華仔話：「唔係，件衫係朋友幫我整，不過我都想靠佢兩個幫我做多啲善事，因為我有時做嘢唔可以亂講嘢，但佢哋可以囉！」咁講即係馮仁昭都可以訪問佢哋關於華仔嘅事喇？華仔講笑咁話：「可以，不過唔好攞咪牌揩到佢哋囉！哈哈。」睇嚟華仔好留意大劉劉鑾雄嘅新聞喎。
自稱片酬平
問華仔有冇試過俾咪牌扑親發脾氣？華仔話：「有扑過，不過就冇發脾氣。」最近有傳佢同緋聞女友朱麗倩去完法國旅行，華仔聽完就笑笑口咁話：「乖啦，唔好問呢啲問題。」唔講感情咁講錢啦，聽講佢喺金融海嘯中都賺成1億？佢話：「唔好亂講，我咁耐都未試過賺呢個數，我片酬好平㗎咋，冇得再減㗎喇。」舒淇話佢減咗片酬後，可以請多10個人，華仔講笑咁話：「好似誇張咗，我最多都係多佢少少。」
另外，問華仔係咪已經落實拍韓片《韓流怪嚇》續集？華仔話：「嚴浩係有同我傾過，我有興趣，等佢哋同韓國傾好先，不過都係明年嘅事。」