議員辯論施政報告，講好多嘢，講到教育時，民建聯議員李慧琼話本港教育可能有問題，大學生中英文水準下降，連佢位同事都受到批評。咦，李議員位同事係唔係指陳克勤呢？
回歸十年，本港不少大機構對大學生英文水平失晒信心，唔少機構需要見工人士考英文或者提供英文水平嘅證明，托福試與IELTS成績都得。政府招聘政務官及其他合約員工，要求申請人考到IELTS六點五分，於是好多公帑支持嘅機構，紛紛效尤。如果由外國讀完書返嚟呢？對唔住，為免被人指責有歧視性，一於一視同仁，留洋學生一樣要有IELTS士哥。
M小姐在美國讀書五年，得碩士學位，又在倫敦紐約工作過接近兩年，最近轉工，一切講妥，點知收到大機構人力資源部通知：「請提供托福或IELTS成績。」M小姐抗議話：「我好多年前考過托福先至去美國，成績已經out晒啦，不能顯示我嘅今日英文水平噃。至於IELTS，我都唔知係乜！」哦完一輪，咪又係要去考，M小姐唯有死死氣，上網搵料，報埋名去考試。報完名之後，佢周圍問人香港大學生嘅標準士哥係幾多，答案係最叻平均數（注意係平均數）低於七分，低者在六點五分以下，當然亦曾有人考到九分滿分嘅。M小姐覺得自己在紐約與倫敦打工，都冇外國老闆質疑佢嘅英文唔得，公司唔要求佢交出IELTS分數，點解返到香港，反而要考英文試呀？佢大概唔知道，特區政府大機構已經對大學生冇咗信心，IELTS分數變成官僚公式要求，於是益咗IELTS賺到好多考試報名費。
為免費時失事，奉勸各位外國留學生在讀書之時，順便考埋IELTS，回港搵工就可以免卻麻煩。至於考試有冇天書呢？左丁山唔知，不過肥仔K講起佢以前在倫敦考IELTS之時，在試場外等候考試，見到唔少大陸及東歐學生刨英文書，似乎可以惡補吓，佢自己就冇睇過呢類「天書」，無可奉告。