寫稿時開住電腦聽UncleRay節目重溫，聽到一首輕音樂，調子好熟，聽耐啲，記得就係利物浦球迷嘅打氣歌You'llNeverWalkAlone（你永不獨行），UncleRay播出嘅版本，音樂憂鬱之中見勵志，與別不同。播完後，UncleRay話係送畀JoeChan（陳任）聽嘅，語音低沉，左丁山不禁心中一震。
到陸羽飲茶，見到局長T與一班退休報壇前輩在房間內飲茶，其中有局長T做總編輯時之叔父輩，可見局長甚為敬老。然後又見到陸羽常客教授C，教授C細細聲話：「陳任有事。」唔怪得UncleRay在節目中提咗JoeChan個名兩三次，又播音樂畀佢聽啦，後來再打聽，阿Joe人在醫院，朋友互相吩咐唔好去探病打攪陳任，以免騷擾佢休息。左丁山希望陳任無事，佢再與一班老友飲幾杯，點知稿還未出，已知陳任離世，不禁記起教授C講：醉酒當歌，人生幾何。
食完午飯就擒擒青去金鐘開會，商家前輩已在，其他人未到，左丁山膽粗粗問前輩：「聽講有好多富豪買Accumulator損失嚴重，你有冇呀？」前輩不以為忤，笑呵呵咁答：「我邊度識得呢啲先進產品呀，我哋老咯，只識見高出貨，唔好貪心過份。」乜老人家咁叻㗎，見高出貨，難度好高喎？前輩話：「我舊年見到澳元已經幾高，地產又旺，於是將幾幢澳洲樓與一幅地皮賣咗，將澳元收益轉番港紙，點知今年上半年，澳元升得好急，朋友都話我笨咗，賺唔到澳元升浪！」前輩點到即止，幾謙虛呀，左丁山當然知道九月之後，澳元急跌，經濟轉差，前輩一早走貨，醒目到極啦。
點解前輩唔教番江浙同鄉睇外匯走勢之道呢？前輩話：「唔同嘅，佢有國家支持，一定冇事，你唔使驚，我同佢冇得比，我差好遠！」從前輩會議室下望，正好望到添馬艦及填海地皮，已經掘到爛晒，如亂七八糟，中信泰富大廈怎能不受影響。突然間醒起十幾年前左丁山做總經理時，新春期間回公司主持開年拜土地，師傅叫我拜邊個方向就照拜可也，師傅話：「左總，你係代表全公司拜嘅，要有啲誠心！」剛巧大廈外馬路掘開掘爛，師傅話主來年有是非，不吉利，請左丁山揀正吉日良辰，午夜時分先至裝香切燒豬。唉吔，拜完咪又係咁，新年後公司是非多多，諸事不順手呀！