上網㩒個掣，大堆爆笑冷知識標晒出嚟，大部份人睇到嘅反應都係：「堅定流呀？」半信半疑？得，靚女講到明，一分鐘唔飲水啃得落一塊方包的話，即送香吻一個。結果？5個MK麻甩男中伏，有包啃唔落，有吻索不得。
記者：許維雅
協力：王震遠
攝影：譚盈傑
模特兒：Wing@Puremodel
1.唔飲水，一分鐘啃唔落方包。
夠膽講句，問十個人十個都唔信一分鐘啃唔落一塊普通Size連皮方包，落MK搵麻甩仔測試，講明邊個完成任務，獎賞有靚女香吻一個。未開始，個個實牙實齒話一定得，仲懶有信心反問：「係唔係每人一啖先？」靚女答：「係！」我之前已經同朋友打賭過好多次，知道一定唔得，你估靚女香吻真係咁易攞咩？
2.紙唔可以對摺超過7次。
7次，聽落好少，感覺幾難以置信，我返屋企試過，大把同事搶住試，結果不論甚麼紙質、大小，都因為太厚而摺唔到第八次。
3.用一次力，單手揑唔爆雞蛋。
讀過物理嘅同學會知道點解，曹宏威博士解釋：「理論上，將雞蛋放喺掌心加壓，九成揑唔爛，因為一，手掌係軟嘅；二，手掌合埋握物，係呈圓形，唔可以完全合實；拱形蛋殼同拱形屋頂原理一樣，有助卸力，分擔晒手掌壓力。」街坊阿榮測試，揑兩揑，爆咗！搞到側邊班朋友成身都係，差啲反面。點解會咁？「佢用指力壓蛋，係捽爆唔係揑爆，力量無平均分散，搞到爆蛋收場。」
4.九成人無可能一次過飲兩排益力多。
益力多細細支，兩排好小數目？No啦，一次過飲兩排，後果分分鐘係噴益力多！Wilson實試，勉強飲得晒，但飲到第七支已經好辛苦。家庭醫生關嘉美：「飲得多會反胃，因為乳酸菌太多，同胃酸過多反胃嘅道理一樣。」
5.根據牛津字典，最長英文字有45個字母。
維基所載長達189,819個字母嘅化學名詞、183個字母嘅希臘字詞無喺字典出現，難以求證。根據牛津字典網上版AskOxford，於字典出現最多英文字母嘅生字係Pneumonoultramicroscopicsilicovolcanoconiosis，總共有45個字母，係肺部疾病嘅一個字詞，解作矽肺病。維基網仲有呢個字嘅即時發音，嘩，fi-li-fa-la咁，聽完都唔識讀，仲要3秒先讀完。
http://www.askoxford.com/asktheexperts/faq/aboutwords/longestword?view=uk
6.拋銀仔1,000次，字向上唔夠500次。
由細到大擲公字，心理上總覺得公出現嘅機會率較高。上網一睇，終於有人認同我喇，因為公嗰邊較重。曹宏威博士解釋：「如果用紅外線平均將銀仔打橫切開，若然公嗰邊真係重啲，公就會出現多啲，即使只係重少少！但兩邊重量係咪唔一樣，我有所保留，因為我未研究過。」
7.人瞓醒高啲，夜晚矮啲。
日夜唔同高矮，堅定流？家庭醫生關嘉美話：「差別只有半厘米至一厘米，因為經過一日勞累同地心吸力影響，脊椎之間軟骨受壓，所以夜晚會矮啲。瞓醒全身放鬆，人咪高啲囉。」
8.無可能用脷舔自己手踭。
脷同手踭距離有幾遠啫？聽落最易，結果當然係個個都舔唔到啦。大家好奇究竟乜人做到之際，終於俾我哋諗到瑜伽大師縮骨奇功，更搵到YogaYoga一位瑜伽導師Sujit親身示範，佢真係萬中無一。
9.豬唔可以岳高頭望天。
獸醫黎昌生：「又唔可以話豬一定望唔到天，但人可以岳高頭90度，豬唔得囉。豬岳高頭角度好窄，因為豬天生主要視線範圍都係望地下。」
10.珍珠浸醋會溶
醋有酸性，但又覺得未至於可以溶化一切嘢，曹宏威博士解釋：「珍珠係鈣質，醋可以溶化鈣質，所以老人家話鯁魚骨飲醋，理論上係啱㗎。」
11.萬樂珠加可樂可以變「火箭」。
好危險，小朋友千祈唔好學！外國有好多關於萬樂珠加DietCoke嘅實驗，兩者產生嘅化學作用好勁，可以形成可樂噴泉，更有曳人將可樂冚埋樽蓋，利用爆發力製成衝力強勁嘅「火箭」。
外國有百厭細路放萬樂珠入可樂樽，再掉落地下，可樂谷爆變火箭一飛衝天，好易整親人，大家小心！
http://www.youtube.com/watch?v=BnRhQDxFlt8
兩個儍佬利用健兒可樂加萬樂珠，整咗個可樂音樂噴泉出嚟，效果十分壯觀。
http://hk.video.yahoo.com/video/video.html?id=301455
12.1,111,111×1,111,111=1234567654321。
唔單止呢條數，你用8個1互Square，答案就係123456787654321，唔講真係無留意。
13.無可能擘大眼打噴嚏，堅持擘大眼，眼球會飛出嚟。
眼球飛埋出嚟咁恐怖？人究竟可唔可以擘大眼打噴嚏呢？關嘉美醫生：「合埋眼打噴嚏係生理條件反射，可唔可以刻意擘大眼打噴嚏我唔知，因為我好肯定無人會預計到自己幾時打噴嚏。不過人嘅構造咁精密，又點會咁易跌隻眼出嚟？」
14.隔住膠紙針拮氣球，氣球唔會爆。
女仔最怕俾爆氣球聲嚇親，想整爆個氣球而又唔爆原來有辦法，只要貼塊細小嘅透明膠紙，用針拮穿貼住膠紙位置就掂。
http://funnyvc.blogspot.com/2007/06/blog-post_1409.html
15.兩個人一上一下抬嘢上樓梯，邊個辛苦啲？
搬大件嘢上樓梯，總覺得負責搬下面嗰個會辛苦啲，但原來根據物理學，答案係兩者都咁辛苦。問過讀香港大學物理學系畢業生，「喺所有條件劃一情況下，只要兩者搬物件重心一樣，力度分散都會一樣，唔會受上樓梯嘅斜度而影響。」不過理論還理論，搬上面位仁兄好易出蠱惑出少啲力，所以答案都係要睇Partner。
16.鯨魚每分鐘心跳九下。
獸醫黎昌生話：「答案絕對正確，越大體形嘅動物，心跳會越慢，狗心跳比人快、雀仔心跳又快過狗，鯨魚身形龐大，新陳代謝慢，心跳大概每分鐘九下左右，因此鯨魚特別長命。」
17.麵包可以當擦膠。
知道泥膠可以當擦膠，但真係無諗過原來麵包都得，結果仲要比我想像中亁淨。麵包中嘅穀殼類蛋白質黏性好高，用麵包擦鉛筆痕，黏性強嘅蛋白質會將炭粉帶走。
18.喺上海可以打電話搵廁所。
喺上海，人有三急可以打熱線114搵廁所，雖然呢個號碼唔係齋為尋廁人士服務，可以問埋其他資訊，但香港嘅1083，就一定答你唔到邊度有得解決囉。
19.蜜糖，係唔會變壞嘅食物。
怪師傅話：「蜜糖係天然防腐食物，蜜蜂製造蜂蜜嗰陣，已經將蜂蜜發酵，有適量嘅酸鹼度調節，基本上外來濕度係唔會對佢有影響。蜜糖沉底現象，只係遇冷熱溫差而形成糖化，並唔係變壞。」
20.據說，70%看過我呢篇大作嘅人，都試圖進行過同一個動作──用自己條脷舔自己手踭。
依我估計，可能不止70%，因為將呢堆冷知識跟同事分享，就連編輯們都個個中招，即刻試做，加句：「唔得咩？」