有時人旺好難擋，當然唔係講我同畢傑，而係講哈利列納；呢個老哥接手熱刺冇耐，聯賽3場取得2勝1和，上仗打低利物浦，今次歐協主場面對薩格勒布戴拿模，「讓球主客和」「主勝」冇問題。
熱刺得列納旺氣照住
球迷或者奇怪，拉莫斯同哈利列納都係用同一班人，點解成績差咁遠？多多少少同哈利列納係傳統英式教頭有關，要求隊員爛打肯拚，對阿仙奴落後兩球都追番4:4，對利物浦輸1球反勝2:1，熱刺鬥志好值得人敬佩；而且人旺起上嚟真係冇得講，謝拉特嗰頭射中楣，轉頭加歷查就擺老烏，一來一回爭幾遠；人旺冇幾何，今次一定繼續追熱刺。
無疑熱刺今仗有柏夫里約真高及哥魯卡不合上陣資格、奧哈拉停賽，好彩熱刺中前場如戴倫賓特、賓尼、莫廸歷都大勇，戴臣本土聯賽停賽，唔影響今仗上陣；以歐協盃分組賽制，5隊波打單循環，有3隊波可以出線，基本上贏晒兩場主場，出線機會都好高；而且熱刺分組賽首戰作客輸畀烏甸，多少都欠運，今次主場對失波數字甚高嘅薩格勒布戴拿模，唔難大炒。
平手鬼盤再追波圖
畢傑兄上期貼波圖W，結果連波都輸埋，不過我哋對呢支葡萄牙班霸信心未減；周三歐聯作客基輔戴拿模，波圖作客差已經通晒天，戴拿模差啲可以主場擊敗阿仙奴，今次開個平手盤低水，似乎「筍」得太過份；一於再追波圖；上周中貼中里昂，周三又點放過佢，不過入球大比「主勝」穩。
牽牛
周中早飛超級重心
星期三7
阿爾堡大（1.65）
阿爾堡首戰歐聯，真係志在參與，之前作客維拉利爾鬥攻之下，以3:6大敗，前嗰場對曼聯，亦都互有攻守下輸0:3，今次入球大穩開。
星期四10
曼城勝（待定）
曼城呢班波幾易捉，主場就買佢，作客就買佢對家，今次主場對川廸，一定求贏波一洗輸畀保頓嘅烏氣。
星期四14
標準列治勝（待定）
標準列治能主場擊敗愛華頓，歐協表現不差；西維爾剛在本土聯賽打少一人之下，反輸2:3，士氣及體力都大打折扣。
難啃早餐
星期三9
辛尼特勝（1.75）
辛尼特呢支歐洲新貴，歐聯打落3場有名大於實之感，巴廸主場可以和祖雲達斯，辛尼特客W熱得唔值。
〈早飛倉〉
主菜：星期四15熱刺勝[-1]（待定）@1,500
渾水摸魚過關：星期三11波圖（平）x星期三13里昂大（1.8）x星期四15熱刺勝（待定）3x1@500
今日早餐價錢：$2,000
上日賺蝕：-$1,500
早飛倉結餘：$93,969
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。