民建聯蔡菜子以往喺立法會好關心古樹保育問題，可惜今屆返唔到入議會，呢個古樹大使身份最適合由公民黨Tanya陳淑莊接班，因為Tanya都係惜樹之人，身兼中西區區議員嘅佢噚日參加區議會搞嘅「石牆樹」儷影活動，同有「樹王」之稱嘅詹志勇教授去到近荷里活道嘅石牆樹，探吓呢棵被剪草工人剪到就嚟命都冇嘅古樹，順便聽吓詹教授嘅護樹心得。
Tanya話呢啲石牆樹好特別，亟需要保護，但清潔工人可能為咗要整到幅牆靚靚，就係咁剪係咁剪，冇諗過過度修剪其實對棵樹有壞影響。中西區區議會特別搞咗個石牆樹攝影同繪畫比賽，就係希望市民多啲關心呢種古樹。