電影《絕代又又嬌》噚日喺荃新天地搞宣傳，鄧麗欣（Stephy）、吳雨霏（Kary）、森美、周秀娜同埋唐素琪都有現身宣傳新片，佢哋喺現場同觀眾大玩遊戲，一班人分成兩隊玩躲避球，着住件短身衫嘅Kary飛身掟波時連件衫都飛起埋，好在淨係見到佢個曱甴肚。
自覺有搞笑天份
導演葉念琛話今次呢套新片唔係講愛情，而係百分百搞笑，主演嘅Stephy同Kary亦都唔使扮靚，仲豁咗出去以醜怪look見人，Stephy同Kary喺套戲入面，仲成個八婆咁係咁鬧交又互打，所以當現場大電視播出該片片段時，個個都笑唔停口。
佢哋之後接受訪問，Stephy話喺新片入面要成日嘈嘈閉同扮醜都幾難，佢笑住話：「惟有唔顧形象豁出去啦，拍攝嗰陣仲因為肉緊而搣到Kary下巴都腫埋。」Kary就話：「我打番佢十幾巴當報仇，加埋前晚喺《翡翠歌星賀台慶》度扮完元秋，我覺得自己好有潛質喺搞笑界發展。」