葉劉淑儀一入立法會就要求政府永久撤銷外傭稅，嚇到政府有氣冇得唞。葉劉噚日同傳媒會面時就話，其實由佢一返香港搞匯賢智庫嗰時，已經話咗要取消呢個稅㗎啦，自己又上街又遊行又同張建宗見面，政府除非以為佢入到立法會腳印印唔做嘢啫，否則點會估佢唔到？
助理班別陽盛陰衰
一心要喺四年任內大有作為嘅葉劉，單靠個人力量又點同政府揮？佢最近請咗四個議員助理一齊打江山，無獨有偶四位助理都係年輕男士，而且學歷都唔錯，被葉劉封為四大天王。呢個配搭可能令人覺得葉劉重男輕女，但八方聽聞同葉劉應徵嘅人士中，都係以男性居多；有個條件唔錯嘅女仔本來都獲葉劉睇中，可惜最終冇去面試，造就咗四大猛男檔嘅誕生。好彩葉劉最近參加咗中大嘅師生計劃，有個一年級靚女學生做佢實習生，戥勻一下佢個陽盛陰衰班底。
原來喺葉劉參選立法會前，中國發改委已經邀請佢加入成為理事，最近終於成事，葉劉已經被委任為發改委旗下中國改革理事會嘅副理事，一年要至少上京開會一次，同中央距離又接近一啲。