溫總講中央全力支持香港，提五項措施撐港，本是老生常談，但港人一於照受，股市大升。嗱，睇真啲嘞，以下五招排名不分先後，究竟係乜：
（一）保障食物供應。做咗幾十年啦，係互利行為，中國供貨，香港畀錢。現在保障食物供應重點，唔係數量，而係質量，希望以後冇毒奶、冇毒蛋，否則香港人被迫要食外國蛋、外國奶！
（二）加快基建，特別係港珠澳大橋。曾特首醒目，一早講咗十大基建，但點解講得快，起得慢？皆因香港有民主程序，講諮詢公眾，講環評，到區議會匯報睇吓有冇區議員反對，仲有鄉民因風水而反對。別人批評香港工程進度慢，大概係唔明白香港制度。民主派議員千祈唔好跟人口水尾而批評基建進度慢。
（三）扶持中小企。中央可以提高出口退稅率，但香港根本係低稅地方，從無出口退稅，點做呀？內地凡事都管，有時減少一啲管制，就以為係扶持企業，但香港從來好少管嘅噃，點計數？聽中小企人士講，佢哋在內地經營，最大一座大山在頭頂就係勞動合同法，中小企嘅代表趙志雄在電台講到幾乎咬牙切齒，聲淚俱下，試問香港特區有無能力要求中央取消或修訂勞動合同法呢？
（四）擴大自由行。舊橋一條，香港人冇話唔歡迎嘅，滙豐梁兆基一早分析咗自由行對香港嘅邊際貢獻不大，當然係有自由行好過冇自由行。
（五）與香港金融監管加強溝通，共訂風險預案。呢樣梗係好需要啦，其實金管局與證監會人員已不時北上溝通，但聽一啲賓架講，任總上到去都未必見到周小川、劉明康，因中央大員官階高，始終與特區政府高層有分別也。但即管話有溝通，中央大員包括溫總在內，思維中有共產黨凡事都管嘅DNA，佢哋對香港之不干預習慣自然睇唔順眼，認為要提高監管，此乃文化差異，我哋不能以為溫總所言就係真理，加入批判香港特區政府監管不嚴之行列。