包玉剛圖書館、包玉剛游泳池、包玉剛爵士癌症中心……「包玉剛」三個字為新一代嚟講隨時係一個設施嘅代名詞。包玉剛曾經係世界船王，好多人都知佢係第一位擔任滙豐董事同渣打副主席嘅華人，又做過基本法草委，但有關佢打大女手板、反對個女嫁鬼佬嘅事就未必有人知。船王眨吓眼就過咗身17年，大女包陪慶睇住爸爸嘅好朋友一個一個咁走，好似睇唔到香港回歸嘅鄧小平，同在位時好風光但係患上老人癡呆嘅鐵娘子戴卓爾夫人，於是決定親自寫本書紀錄老父生平。
噚日嘅新書發佈會上，行家似乎都好緬懷包老先生，不停問包陪慶如果佢在世會點睇金融海嘯？如果佢在世會點睇香港回歸11年？難得包陪慶保持禮貌作答，唔怪得佢話老父管教嚴，帶佢見大場面啦！