「六樓后座」由一個畀後生仔hea嘅地方，到搬上銀幕整合為電影故事，再變成今天的舞台劇，一變再變已經近10年。電影《六樓后座》總是散發着一種青春活力，就如阿旦在電影結尾字幕說的：「識得笑，因為我哋青春過。」可能就係呢一種年少輕狂，令一班「六樓后座」的主腦，由大銀幕走上大舞台，孖住葛民輝、鄭丹瑞、黃精甫等，一齊做大戲！
記者：蒙為亮
攝影：陳盛臣
場地：LaiWingManGallery
小男人湊仔記
講「六樓后座」不得不提「爸爸」阿旦鄭丹瑞。用上爸爸的稱呼絕無誇大，連他也自稱老竇：「真係睇住佢大，佢哋由有血有肉的真人故事到拍成電影，再到埋班做劇社，𠵱家又進軍大舞台，真係有點『老懷安慰』。」講到呢位小男人點樣含辛茹苦由BB出世到學行，教佢哋ABC，到𠵱家長大成人，「真係一疋布咁長，我驚講到你無得收工呀……哈哈！」阿旦笑說：「當年商台識咗張帆，見佢有幾分姿色，所以收咗佢做徒弟，跟我度橋。當時我成日問佢你平時做咩㗎？佢得一個答案：『去后座hea』！一個hea字打從心裏便產生一個對號入座的思想，『后座』是一個不務正業的三教九流之地，我自己一直都無上過去。」直到有次同黃真真萌生一個青春劇的合作念頭，我腦裏只得一個畫面就是一派年輕人打打罵罵玩玩，虛度青春的《六樓后座》。」到拍電影版時阿旦才第一次上去：「那是我同林嘉欣演嘅煞科一幕，起初都係不情不願的上去，點知比我想像中好得多，不算太頹廢，反而有一種前所未有的新鮮感，之後間中都有上吓去同啲後生仔吹水。不過亦有見到佢哋係威係勢，出到去就一事無成，覺得好激氣！」阿旦坦言有時都會嬲到鬧佢哋。今日看見他們登上大舞台是否已經心足？「當然未夠啦！今次只係小試牛刀的firststep，最希望佢哋可以衝出亞洲，我就心滿意足。」又是一副望子成龍的爸爸心態。
做舞台劇好似吸毒
今次找來葛民輝crossover舞台劇，正合阿葛作風，小至雜誌的熊bearbeartee，大至老麥北京奧運行，訪問時身穿ABathingApe×A4tee的阿葛，自言向來喜愛同人交叉合作：「多個人諗嘢可以喺創作上擦出更大火花，而且我都可以話係最老member！《后座》喺世貿十樓嗰時，我哋已經開始一齊搞嘢，做過小劇場，開過party，佢哋係一班好有目標同方向嘅年輕人。之後到藝穗會，𠵱家再到文化中心。我覺得『后座』係一個畀後生仔發夢嘅地方，一入到去你自然會胡思亂想，講起都有啲鬼……哈哈！」
他打趣說今次「后座」進軍舞台，就像吸毒一樣：「我自己當然唔睇好啦，成日見啲舞台劇人，好似彭秀慧咁，只會一直咁沉淪落去，好似吸白粉咁，越食越多，個台越做越大，甚至不計成本，傾家蕩產，全為搞一場goodshow，而且今次更加大鑊就係佢哋搵咗個儍佬做opening，講真個儍佬乜都未預備過，而且又係第一次真正做劇場演出，個劇可能會有一百個演員，或者得一個人做talkshow，到𠵱家都無人知，只知道下手嗰位鄭先生就麻煩啦！睇佢點接！」口中的儍佬當然是阿葛本人啦。至於以上「舞台毒品宣言」又當然全是反話，「佢把口咁講，但我哋今次真係無咩budget畀佢，阿葛反而要倒貼，而且有時更會忙上四個鐘頭同我度rundown。」當場給「后座」主腦張帆踢爆，她更笑言阿葛無賴死在台上不肯走，已是萬幸，看來中毒的是阿葛本人吧！
一個器官定義人生
阿葛、阿旦、張帆三人都來自商業電台，而且經常在商台後花園「幽會」。聽到「幽會」二字，阿旦立刻大笑：「哈哈，其實後花園是個講秘密、訴苦，同開會度橋嘅好地方，好多商台大project都係喺嗰度「度」出來，吹吓水飲吓汽水，特別快有新idea！《后座》部份構思也是在這裏產生。至於阿葛，當時佢就經常出後花園『呼吸一下』唞唞氣，我哋三個就係在後花園搭上。」今次舞台劇除了他們，還有電影導演黃精甫、日日唱住「ABC係我！」嗰位MCJin歐陽靖、商界女強人康虞茱廸及時裝設計師王永吉，七人各自炮製十多分鐘舞台劇，redefine心中一樣東西，有點像早前的電影《十分鍾情》。「好似打乒乓球，我出上旋，下家唔知會點回，整個過程非常新鮮刺激！」擺頭陣的阿葛會以一段短劇重新定義whatisintermission？「Intermission不止在舞台劇或演唱會的間場之中，生活中的分分秒秒也可能是intermission，每個人喺工作上、玩樂上，甚至演藝生涯上也有各自的intermission，定義也不同。我可能會用talkshow形式來表達，至於內容係點……咁快講定邊有驚喜㗎！」這邊阿葛故弄玄虛大賣關子，那邊阿旦則來得切切實實：「我會用身體一個常用的器官來redefine我的人生。」話畢，我和阿葛立刻心邪，邊個器官先？「好正常㗎！總之唔係你諗嗰啲啦！」在場的都笑了，可能在台上做甚麼不是最關鍵，能保證全場好氣氛才最重要，而搞笑搞gag向來是阿葛阿旦的看家本領。
六樓后座演進史
「六樓后座」原是個年輕人的聚集地，01年成立劇團發展劇場文化，支持「人人可以是導演，人人可以是演員」。02至08年曾創作的劇目有《皮肉生涯原是夢》、《死亡咖啡店》、《以前拍拖型好多》、《Love&Death》、《愛情寶福山》及《街市》等，由初期在藝穗會搞小劇場，到現在進駐文化中心，原來經歷已近10年。
盛惠每位$780
香港經濟由盛轉衰，又裁員又減薪，連電視台都話要削減成本，看到舞台劇的票價當堂咋舌，除了學生老人家傷殘人士優惠票價，其餘只劃一收費$780！阿葛同阿旦齊聲話由始至終一個仙都無賺過，主腦張帆也認真地答：「所有資金都放在舞台上面了，雖然投資者都未必有錢賺，甚至要蝕，但係說到底演員都要開飯㗎。而且在舞台效果上，我哋都落咗一番苦功，我可以保證入場觀眾唔使驚，你哋所睇到嘅一定會值回票價！」藝術可能真無價，但暗地裏都戥佢哋有啲擔心票房……
《Redefine六樓后座》
時間：11月26-29日8pm
地點：香港文化中心劇場
票價：$780、$180（學生、長者及傷殘人士）
查詢：27349009
網址： http://www.happypoor.org