肥彭又嚟啦﹗彭定康噚日到咗香港，仲喺中環一間書店舉行新書簽名會，經濟不景，依然有幾十名fans，捨得用360蚊買佢本新書《WhatNext？SurvivingtheTwenty-FirstCentury》兼攞簽名同合照。睇佢噚日出現，金融海嘯同美國大選通通議論一番，但記者問到煲呔民望沉底，即刻收口唔答。回歸後肥彭嚟過香港幾次，仍然人氣不減，點解？喺公開場合保持笑容，永不面黑，同埋只識得喺適當時候講適當嘅話題，政客儀態可以係好簡單自然，唔係自己認就得。
肥彭上次07年初嚟香港，又係宣傳新書，呢期遇着全球金融海嘯，有到場記者問佢點睇。講到經濟問題，肥彭大把意見，認為金融海嘯影響全球，形勢非常嚴峻，佢十分認同港府喺呢個艱難時期，大力投資基建刺激經濟。佢提醒香港市民要有心理準備，09年會係非常困難嘅一年，相信到2010年就會好轉。佢話只要港人保持信心，絕對相信香港能夠克服當前危機。
「兩特首同肥彭冇得比」
但記者一問到市民對港府施政彈多過讚，煲呔民望又起勢跌，本來以為肥彭會有乜高見，點知佢突然收口，話好耐冇嚟香港，唔想評論。呢啲優質政治技巧𠵱家都好難喺香港睇到，有排隊等簽名嘅市民有感而發，「回歸後兩個特首，真係不知所謂，同肥彭冇得比。」另一fans就大讚肥彭政治手腕同親民作風，值得政府領導層學習。
識得適當時候收口，難怪肥彭同北京關係越變越好，能夠由回歸前被詛咒「千古罪人」漸漸變做「政治明星」，早幾年以歐盟專員身份同江澤民會面，又應邀到北京中央黨校演講，至於佢本舊作《非一般的外交家》，內地亦譯成中文。
簽名會期間有記者指肥彭身形纖瘦了，肥彭好受落仲笑住話：「NotslimlyasIshouldbe（我應該再瘦啲）.」但當收到外籍女fans送上佢最飛佛嘅泰昌蛋撻時，即時又忍唔住連食兩件。我哋嘅曾特首有議員怒掟請食蕉，前港督肥彭卸任咁多年，都仲有fans捧場同請食撻，唔知煲呔會唔會呷醋呢？
肥彭又話，喺香港今次嚟到，仲會同一啲「oldfriends（老友記）」見面。至於會唔會同煲呔、陳太同馬丁等人見面，佢只話「maybe（可能）」，話即使見面都只係非正式場合喎。肥彭今日會繼續舉行新書分享及簽名會，仲會同泰昌蛋撻老闆歐陽天閏及個別前任官員見面，聽日會去港大演講，晚上再開記者招待會。星期四晚就轉飛澳洲繼續宣傳新書。
mailto:[email protected]