毒奶事件，令民族品牌蒙牛（2319）股價一日間暴瀉六成。內地《中國經營報》噚日頭版報道，董事長牛根生10月初出席一個內地企業巨頭飯局時，聲淚俱下求救，指蒙牛陷入外資敵意收購危機，形容蒙牛「到了最危險的時候」，結果，得到聯想柳傳志同中海油（883）董事長傅成玉等人拍心口幫手。
蒙牛噚晚向內地和訊網回應事件，證實確有其事，指老牛基金會曾將牛根生捐獻嘅4.5%蒙牛股權，抵押畀大摩，為免呢批股票價值跌得甘而俾人拎去賣，老牛基金搵聯想控股撲水，贖番抵押畀大摩嘅股份。
中海油2.5億候命
蒙牛求救消息嚟自牛根生一封「萬言書」，據報道，10月中牛根生寫咗封信畀中國企業家俱樂部理事同長江商學院嘅同學，提到老牛基金將一批股份抵押畀大摩。
封信指「（蒙牛）股價暴跌，導致我們抵押給摩根士丹利的蒙牛股份在價值上大為縮水，這引得境外一些資本大鱷蠢蠢欲動……能不能及時補足保證金，關係到企業話語權（即係話事權）的存亡。」外資收購關乎民族面子，一班老總都唔敢怠慢。
柳傳志最快手，連夜召開董事會，48小時內科水2億人仔畀老牛投資（持有老牛基金）。傅成玉亦打電話畀牛根生，好豪爽咁話：「中海油備了2.5億元，甚麼時候需要甚麼時候取。」
其他伸出援手嘅仲包括網通前副董事長田溯寧、阿里巴巴（1688）主席馬雲、復星（656）主席郭廣昌等。百仕達（1168）主席歐亞平更急call長江商學院同學，叫大家買蒙牛撐股價。關乎民族，邊個敢怠慢？
李華華
mailto:[email protected]