環球金融海嘯下，大家日日都講緊裁員、減薪，但其實唔係人人都要面對呢啲衝擊，喺東泰證券做咗9年嘅財經名嘴鄧聲興，今日就正式過檔泓福資產管理（RedfordAssetManagement），做執董兼研究部主管，薪金加幅仲有番咁上下，認真係逆市奇葩。
鄧聲興加入東泰之初，只係研究部經理，做吓做吓，升到研究部董事，佢青靚白淨，經常上電視、電台講股，吸引咗大班女粉絲。
佢同華華講，喺東泰做咗咁耐，點會冇感情，但自己就快40歲，都係時候有啲轉變。咁啱有個朋友介紹泓福個老細畀佢識，大家年紀相若，一拍即合，加上待遇優厚，就咁決定過塘。
過檔泓福只帶兩人
鄧聲興仲會帶埋跟佢多年嘅秘書姐姐，同埋一個研究部同事齊齊轉工。佢好實際咁話，希望第日搵多啲，亦會繼續上電視、電台講股，女粉絲們唔使擔心見佢唔到。
咁新公司有乜來頭呢。泓福主席叫曾慕秋，39歲，好後生，建築師出身。聽講佢家族經營好多生意，包括礦同紙廠，金融只係其中一瓣。泓福最初只係做財務顧問，早幾年收購證券同資產管理，越做越全面。照咁睇，鄧聲興過檔後，應該大有作為。