澳洲聯邦銀行出咗新一份「iPod指數」，睇吓第4代8GB容量嘅iPodnano，喺全球62個國家嘅售價，咁就知貨幣嘅強弱。澳元近幾個月大幅貶值三成，結果令澳洲一躍成為買iPodnano全球最平嘅國家，印尼第二！
上年香港買最抵
呢部第4代iPodnano，美國賣149美金（約1162港銀），香港蘋果店賣1150港銀，喺澳洲呢？132美元，即係大約1030港銀，約係美國同香港嘅89折。
呢個指數上年都有出，當時比較嘅係4GB容量iPodnano，結果最平嘅地方係香港，只賣1155港銀，第二平係巴西，只係一年時間，美元走強，同佢掛鈎嘅港銀亦同一命運，所以最平嘅售賣點亦讓咗畀澳洲。個報告話，由iPodnano引伸到其他商品，例如鐵、煤及銅等，就知大家出口嘅競爭力。