女人要名份，男人何嘗唔着緊？民主黨甘乃威被民建聯所累，做唔成雷曼調查小組副主席，民建聯副主席葉國謙要道歉，卿姐食住上，認為民建聯應該畀多兩分誠意，以實際行動彌補民主派損失。
都已經道歉啦，唔使負荊請罪打一身啩？卿姐話大家斯文人，一定唔會動手，有乜事可以坐低慢慢傾，梁展文事件調查委員會稍後成立，正、副主席人選應該好多人「恨」做，卿姐話如果民建聯真係有誠意，應該同民主派協調，建制派唔好又霸晒兩個位，讓晒兩個位出嚟更好。
按議會慣例，調查委員會一般由9至13人組成，正、副主席一般由民主派、建制派各佔一席，只是今屆黨派競爭激烈，民建聯又黨紀不嚴，民主派繼續被封殺唔出奇。