謝霆鋒與張栢芝經過幾許風雨，終在06年結婚，年多後，愛兒謝振軒（Lucas）出世，一家三口樂也融融。豈料今年初卻爆出震撼娛樂圈的淫照風暴，霆鋒日前接受本報記者專訪時表示，與陳冠希（Edison）認識至今已13年，對他沒有仇恨之心，並會包容栢芝的一切。 撰文：魯萍
張栢芝年初牽涉入淫照風波中，隨之而來是她與霆鋒感情破裂、分居鬧婚變的傳聞，現在一切事過境遷，上月兩人還拍拖到中環溫馨晒幸福，雖然一切看似回復平靜，但避走美國的淫照主角陳冠希又如何？霆鋒日前接受本報記者專訪，問他會否對Edison存有仇恨之心？他先搖頭後苦笑說：「冇！」
「成日攞我同佢比」
問霆鋒可會與Edison再做朋友？他說：「嗱，我就冇所謂嘅，做男人我覺得要有三樣嘢，就係自量、體諒同大量，自量我未去到，大量我亦唔敢講，而體諒可以令我同太太有呢個關係，甚至對其他人或者傳媒，人際關係呢樣嘢好麻煩，未發生件事之前，成日攞我同佢（Edison）比，我有冇出嚟講過一句話？95年我哋開始做同學，到𠵱家識咗13年，你估我唔清楚佢係乜人咩，我識佢耐過我老婆。」
霆鋒多次接受傳媒訪問時，口口聲聲說不介意太太栢芝與淫照事件有關連，問霆鋒心裏是否真的連一根刺也沒有？他說：「我都講過，第一，我識咗佢11年，我跪地求婚嗰日，已經知佢係乜嘢人，講真佢對我亦唔錯，我娶一個老婆返嚟，我會唔知佢係乜人？我好了解佢，我哋兩個形象都差唔多，都係好黐線，敢作敢為好離譜，我可以講我絕對信任呢個人，我老婆係我求婚娶返嚟，你估我真係儍仔笠住個頭去求婚呀？之前梗係有某個程度嘅認識，當然有啲事未必知，但每個人都有過去。」
就算雙方已互相了解，是否足以衝破作為男人及丈夫的心理關口？霆鋒說：「我知你嘅意思，所以我喜歡呢個人，我亦會有某個程度嘅包容，我求得婚就要包容佢嘅一切，包括好同唔好，我係一個好大男人主義嘅人，我亦唔係完美，但佢亦包容我好多嘢，我脾氣唔好，成日做嘢冇時間陪佢，亦唔可能笑面迎人，所有嘢佢都好包容我，或者係我哋都互相體諒。」
「同老婆同一陣線」
問霆鋒自淫照事件發生後，與栢芝的感情可有出現過危機？他面露笑容語氣堅定地說：「零。」他認為身為男人要維護家庭，應該要和太太同一陣線，他說：「我同老婆企埋同一陣線，我哋好幸福，仲有個咁嘅仔，俾記者追住影相唔喊唔驚。」
攝影：陳順禎
「只想Lucas幸福」
身為人父，如今最令霆鋒擔心的是兒子Lucas往後的成長日子，他說：「我一出嚟就俾人鬧，翻天覆地，我係邊個啫！我只係謝賢個仔，全港600萬市民睇住我大，𠵱家到我個仔，俾13、14億人睇住大，我出埠已經有fans舉我個仔嘅名牌，叫我個仔嘅名，佢係謝賢、狄波拉個孫，謝霆鋒、張栢芝個仔，幾咁唔公平，有幾大壓力。
「我阿媽喺我6歲送我去加拿大，13歲俾人話我入黑社會，冇得避。我做嘢咁博為乜？就係要擺脫名人之後同上一代嘅影子，我諗我今日做到咗，但我亦畀咗好多壓力我個仔，我唔係要佢做超人，只想佢開開心心簡單過每一日，但要佢承受得起所有壓力先囉！」
難忘童年遭掌摑
霆鋒不想兒子入娛樂圈，最近有公司出8位數酬金請Lucas拍廣告，遭霆鋒拒絕，他說：「只係拍幾個鐘就收過千萬，但我同太太都唔OK，我細個時就係冇得sayno，俾人摑到牙血都流埋，新年影全家福，你唔笑，一巴打埋嚟啦！我只想佢幸福。」
欣賞李亞鵬護妻女
謝霆鋒舊愛王菲的小女兒早前在泰國被記者追訪，李亞鵬護女心切怒打記者，霆鋒表示明白李亞鵬當時的心情，他說：「如果遇到相同情況我都係咁，有邊個唔保護屋企人，天下父母都有保護子女嘅意識，呢樣係本能，好似上次我喺泰國返港落機，係嗰單重案（淫照事件）之後，我哋兩個人一齊行出嚟！我知會有好多記者採訪，但係好多記者都會自動自覺退後，仲話小心唔好撞親個BB，我好多謝大家嘅體諒，只要互相尊重就唔會有問題，最緊要係大家都舒服。」
凡事盡全力
00年霆鋒在紅磡開演唱會，事業一帆風順，但他02年因頂包案入獄，經歷風雨後，霆鋒說他沒有改變過，他說：「我相信仍然係嗰個謝霆鋒，我成日講一個人返到屋企望住塊鏡，可以同自己講今日做嘅事盡咗全力，自己做過乜只有自己知，喺出面我受千夫所指，工作冇人提，只係講我嘅感情生活，你覺得一個所謂電視深情專訪，就可以了解一個人咩？冇可能。」
