民建聯陳克勤英文差被笑，知恥近乎勇已努力惡補，咁長進值得鼓勵，想唔到黨友卻落井下石。新丁李慧琼噚日喺施政報告辯論發言時，指香港教育制度有問題，令大學生英文水平下降，仲拉埋陳克勤落水，不點名咁講有議員都俾人批評，黨友都冇面畀。其實李慧琼都算克制，冇斥責陳克勤啲英「乳」教壞佢個寶貝女。李慧琼發言時，陳克勤巧合地不在場。
煲呔為慶祝中共建政60年，誓言要大灑金錢搞國民教育，每年資助約17,000個學生到內地「學習」，教育界議員張文光指咁做擺明係趨炎附勢，純為討好阿爺，向北京交心，只怕老師要頻頻帶團北上，變相淪為導遊，疏於教學，學生得不償失。