主席W間智庫又出咗一個報告，講香港與廣東、珠三角之融合，甚至講到廣西，一共提出二十二項建議，呢日碰到主席W，於是問佢：「你哋提出咁多建議，可講係花多眼亂，由高速鐵路至到八達通，究竟你鍾意邊一項呀？」主席W話：「每一項我都鍾意，又唔係請政府明天就完成，可以分十幾年逐項講，政府有大把時間考慮清楚。」呢類報告其實出爐之後，送交政府，好快就會畀人束諸高閣，之後封塵。試問現在有誰人記得文化委員會？文化委員會喺○二年尾交畀政府嘅報告，有冇人睇過？政府已經唔記得晒啦？當年張校長做文化委員會主席，十分費勁費神，佢如今諗番起，不知會否啞然一笑。
主席W一味話唔使睇得咁灰，佢認為香港與珠三角一定要融合成為整體市場，香港先至可以走出現時嘅小格局，不致成為廣東海岸嘅一座孤城，政治上可以一國兩制，但經濟上就合則利，分則衰，港人不可不察。如果要佢揀一項基建最優先推行嘅，佢就話會揀高速鐵路，建成後，喺西九龍上車，四十分鐘左右就可到達廣州，似足由大阪坐高速鐵路火車去神戶，你話幾方便呢？想落又係，好多外國人到日本關西旅行，未必拖住行李周圍去每個城市，而係以大阪為落腳點，譬如住在大阪希爾頓（火車站對面），每日可乘搭火車到京都、奈良、名古屋、神戶各城市遊覽，即日來回，不知幾方便。他日廣深港高速鐵路建成，外國遊客來港住酒店，搭火車去廣州，或搭火車去深圳轉其他火車到珠三角各城市，即日來回，香港一定多咗好多旅遊生意。
有冇人反對高速鐵路呢？會有嘅。七十年代嘅羅德丞議員反對興建地下鐵路，九十年代嘅飛天朱議員反對興建機場至中環（全程二十三分鐘）鐵路，皆是範例。希望他日高速鐵路唔會惹來太大反對聲音啦。主席W不忘一提，如廣深港鐵路連接，最好香港八達通都與珠三角連接埋，咁就認真方便。八達通可能係香港在二十世紀最大發明，原創人不知是誰，總之是香港的驕傲。