小妹呢排收到一個幾搞笑嘅email，內容係話有班人喺旺角朗豪酒店日本餐廳酒吧Tokoro入面，就11月4日美國總統選舉邊個勝出拗到面紅耳綠，其中話奧巴馬贏梗嘅Wilson，同支持麥凱恩嘅Henry拗得最犀利。最後佢哋各自拎張信用卡出嚟，話如果自己支持嗰個輸咗，就要請晒所有嚟Tokoro酒吧嘅人飲一杯嘢，直至年尾為止。
有效期至年底
遊戲規則係顧客只要去到酒吧叫嘢飲嗰陣，如果係奧巴馬贏，就同職員話「入Henry數」，如果麥凱恩贏就話「入Wilson數」，咁就可以免費飲一杯酒。千祈唔好掉轉呀，講錯咗要收錢。
小妹收到呢啲email都係半信半疑，點會咁大隻蛤乸隨街跳，輸咗嗰個條數都幾襟計，會唔會兩條友酒後胡言亂語，酒吧唔認數㗎。我上佢嘅酒吧網睇一睇（ http://www.tokoro.com.hk），真係出咗個通告，話真有其事，有效日期到今年12月31日。
諗諗吓，會唔會係酒吧宣傳伎倆，小妹直接打電話去Tokoro問清楚，接電話嘅酒吧職員譚小姐話係真人真事，唔係酒吧宣傳。Henry同Wilson係佢哋嘅熟客。11月4日美國大選有結果後，顧客喺每日6pm至12am到酒吧，叫嘢飲嗰陣正確講出要入Henry或Wilson嘅數，就可以唔使錢飲一杯standarddrink，例如60幾蚊嘅啤酒咁。
電郵：mailto:[email protected]
逢周六、周日刊出