「港版畢菲特」四叔李兆基不時發放股票心得，成為不少股民「明燈」，其實另一個與「四」字有關的賭王何鴻燊四姨太梁安琪都好有投資心得，最愛投資房地產。日前田北俊坦言「有錢佬個個炒燶」言論，不過四姨太前晚同陸菲特講投資理論時依然好積極樂觀。
問四姨太有乜嘢好股要入，佢大賣關子：「金融海嘯十分恐怖，大家都要有經驗唔好貪心，買賣股票梗係有賭博成份，個冧巴就費事講，費事同人賣廣告，總之呢個時候入市一定要睇清楚，入啲優質藍籌股，任何股都要睇業績，有啲股票買嚟收息，有啲係要有地產股份，因為地產始終係香港好重要嘅經濟元素。」
四姨太仲同陸菲特講認同「CashisKing」的金科玉律：「都係以穩陣為主，我𠵱家有10蚊，會有5蚊留喺身邊，之後將錢分三嚿，一嚿投資地產，一嚿買股票，一嚿留嚟收息，如果個市有乜嘢事可以好大劑，買樓嘅始終都喺度，千祈唔好過份貪心投機。」
撰文：陸菲特