一間上市公司股價5角多，但每股NAV接近3元，市賬率只係0.17倍。股市大崩圍之後，好多股票股價都跌到極不合理水平，相比NAV大折讓八九成的雖然唔多，但有。
不過，仲有一樣更引人憧憬嘅，就係公司所持有嘅現金，幾乎係市值嘅幾倍，股價跌得咁過份，咁殘，真係幾難搵到第二隻，呢間公司就係有利集團（406）。
今年9月，有利就不停回購，14日內買咗286.4萬股，回購價在0.85元至0.62元之間，數量唔多，但顯示公司都認為抵買。近日，又再開始回購。
08年度（3月年結）的年結日，有利資產淨值12.83億元，每股NAV2.91元，股價大折讓8成有多。流動資產16億元，其中現金及銀行存款9.57億元；流動負債5.08億元，包括短期銀行貸款1.58億元，公司發行4.4億股，每股所持的現金為2.175元，足足係市值的4倍。
拓展海外市場有成效
有利主要做建築業務，多年前在銅鑼灣投資興建一間酒店，去年出售，套現15.8億元，獲利7.95億元，公司未有再投資，因此持有逾9億元現金。
有利股價低殘，除跟市下跌外，核心業務不濟，亦係原因之一。08年度建築業務就出現虧損3.7億元，令全年計入出售酒店後的溢利只有4.22億元，每股盈利95.7仙。
不過，現年度，有利經營環境應有所改善。第一，原材料價格回落，成本降低；第二，公司致力開拓海外市場，並已取得成效；第三，全球經濟被金融海嘯冚埋嚟，無疑會放緩或甚至衰退，但各國已不停放水，並且要大舉增加基建以刺激經濟，對建築行業大大有利。
集團在年結日手上合約總值達38.78億元，現年度上半年，再取得3份合約總值12.27億元，並完成兩份合約共7.17億元，以公司運營恢復獲利計，一年做十多億元生意，賺2至3%就有三四千萬元，加上手持現金的財務收入，一年賺逾5000萬元，應屬保守估計，預測PE只係4倍多，股價翻一番，回升到1元水平，仍只係現金值一半，仲係好吸引。
郭兆誠