鄉議局上屆有四個立法會議員，今屆剩低發叔同張學明兩個，係時候物色新人加入。法律超人謝偉俊係好人選，原來佢係元朗十八鄉原居民，太公分豬肉時佢有份，近年過時過節，有時都會返鄉下同親戚過節。謝偉俊話佢有丁權，幾年前向政府申請起丁屋，但等咗四、五年，至今毫無聲氣，估唔到申請興建丁屋真係咁鬼難。不過佢話自己住港島區多年，就算有間丁屋喺元朗，相信都唔會搬返鄉下，況且申請冇晒下文，申請真係批出先算啦。
鄉議局主席發叔大感冒仍未康復，日前唔可以同梁劉柔芬及其他獨立議員食盆菜，成班人改食廣東菜，政治性聯盟難產，「飯聯盟」則順利開局。