中原地產老闆施永青半推半就，應煲呔邀請加入經濟機遇委員會，正常人都唔期望呢啲吹水會真正幫到市民，施老闆接受委任後，亦潑冷水叫市民唔好以為呢個會係指路明燈。
講得咁盡，施老闆似乎想覆水回收，噚日喺電台節目中補鑊，表示會都未開，就貶低個會冇料到太武斷，佢話開會有冇成效，第一要睇開會啲人有冇真知灼見，如果人人噴口水，自然冇作為；其次係官員對會上意見聽唔聽得入耳，如果當耳邊風，咁開會亦冇乜意思，簡而言之佢認為大家應該聽其言、觀其行。施老闆又謙稱自己層次低，大學都冇讀，只係地產經紀出身，開會講吓己見，同其他銀行家、金融專家無得比。