EmiFujita藤田惠美喺發燒界無人不識，早登天后級！但一般樂迷呢？唔少只係知佢早排上《勁歌》；但我深信藤田惠美憑住一把純潔無瑕、猶如天使下凡嘅聲線，打動普羅樂迷指日可待。
舊曲新唱
下星期藤田惠美便會第二度來港開個唱，演唱會前Emi推出咗呢張《心之餐桌》專輯，亦係佢個人出道以嚟首張日文歌專輯；14首作品中有13首是重唱別人的歌，只有最後一首《愛的景色》係由自己包辦曲詞嘅全新創作，對於30歲以上又常聽日文歌嘅朋友，聽中島美雪嘅《薊女搖籃曲》或松任谷由實嘅《畢業寫真》等13首八、九十年代名曲，應不會感到陌生，但Emi仍能以自己個人風格去演繹每首作品，伴奏亦一如過往以簡約為主，既有新鮮感之餘亦另有一番韻味。好似Emi重唱Chage&Aska經典之作《開始時總下着雨》，只以鋼琴及少量弦樂伴奏，少咗原版本那份激情豪邁，卻多了一份溫婉及盪氣迴腸。
SACD日本壓碟
但印象最深係Emi重唱自己成名作《溫暖的詩句》，全曲只以木結他及口風琴兩件樂器伴住Emi甜美又溫柔嘅歌聲；Emi唱功固然大有進步，但呢首歌所展現嘅靚絕音色，至係我要急於擁有SACD主因，可能係日本壓碟關係，就連SACD版內嘅CD層亦比普通CD版靚聲，對於唔計較音效嘅一般樂迷，其實CD質素已相當唔錯，只係日本版SACD難得有行貨，售價比起日本當地買平接近一半，點忍得住手？
文：李廸偉
http://hk.myblog.yahoo.com/reviewcd