人所共知，雙子係個善變嘅星座，有雙重性格，佢哋唔可以忍受單調呆板，最叻係失驚無神嚇你一驚。肯定，會變身嘅開篷車最啱雙子個性，OpelAstraTwintop時而斯文、時而奔放，變臉驚喜，就在頂篷開合之間。最近更加出其不意，車價勁減五萬，擺明觸覺敏銳，順應近排慳家勢頭，又係雙子本色。
記者：黎頌詩
攝影：梁細權
Model：Kinki（StageModel）
隨時野得起
雙子座嘅人外觀上多屬智慧型，一般都輪廓柔和，不浮誇，所以，雙子人唔會非常奪目，令你眼前一亮，不過就眼仔精靈，活力十足，亦都因為咁而充滿魅力。睇番雙子車AstraTwintop嘅外觀，同樣屬智慧型。關上頂篷後，佢就係部行政味十足嘅房車。車身尾部稍為提升，相當流線，造型上就偏向簡潔，只係喺線條上下工夫，就好似尾燈同尾冚組合出特別嘅線條，而且車尾呈箭頭形，頗有趣味。所以Twintop簡簡單單卻唔會呆板，再細心睇真車頭，你就會更加發現佢不甘枯燥嘅雙子個性：車頭嘅線條明顯較車尾粗獷，方格狀鬼面罩及氣壩，再加上桶形頭燈組，一睇就知賣跑味！斯文Look卻又難掩玩得本色。想玩的時候，雙子會忽然變臉，有時會讓人難以捉摸。Twintop要變臉，同樣話咁快。只要興之所至，即使行駛途中只要一按掣，三片式硬篷就會於瞬間打開，想野想奔放？隨時隨地隨你喜歡！
雙面性能
開篷後嘅Twintop，形象亦為之一變，沒有了低而流線嘅車頂，輪廓變得方正硬朗，剛陽感即時出晒嚟，其實呢個先係雙子本色！雙子充滿活力又不安份，天生好交際，係出色嘅吹水王，有咁嘅個性，又點可以一味屈喺車廂內自得其樂？開住篷，招搖過市同外面世界嚟個全接觸，吸引盡身邊異性先啱路數。呢個時候，最緊要係ShowOff，所以展現於人前嘅內櫳就梗係要表現吓活力啦！相對硬淨嘅跑味桶椅，有凹陷手指位嘅跑車軚環，都輕而易舉賣弄運動感，不過，大量用上充滿光澤嘅鋼琴面飾，又帶嚟高雅味，矛盾得來又跟跑味配合得好和諧。Twintop嘅雙重個性表現得相當徹底，外觀、內櫳，到性能，都Keep住善變特質。1.8公升140匹馬力，屬溫柔格局，加速、掟彎穩打穩紮，讓你氣定神閒，一切盡在掌握。想變身，玩激啲？都得！按一下Sport掣，軚感、油門同波箱即時反應更敏捷，有啲跑車Feel！不過，雙子雖然活動力強，不過耐性就唔多夠，做事較難貫徹始終，睇嚟，好快又要嚟次按掣關篷玩自閉啦。
規格
引擎：1,796c.c.直4
馬力：140bhp/6,300rpm
扭力：175Nm/3,800rpm
傳動：4前速自動波
售價：最新優惠價：$269,800（原價：$319,800）
查詢：MetroMotorsLtd.（27608668）