花弗公子「子宮」自從搭上「大笑姑婆」後，多咗人識，又可以利用吓大笑姑婆幫公司draw吓新聞，真係唔多唔少都有得着。咪睇子宮一個大男人，其實佢計婆乸數都有一手。關仁耳聽八方，早輪就聽到子宮公司附近一間修甲店啲妹妹呻，話有日子宮自己摸上門話要修甲，新客問價都好正常，但子宮就問長問短，搞一大輪，仲好急話要即日喺返工時間嚟修，咁人哋咪hold起個期畀佢，點知到時到候，子宮居然冇到，修甲妹妹打電話畀佢，佢就連電話都唔聽。可憐呢啲妹妹靠拆佣計人工，推咗其他客嚟就子宮，最後又要白等，其實打個電話取消啫，子宮都唔做，真衰。
Textby關仁