裘俊，吖唔係，係「包國仁」，真名徐榮，真係做過貨車司機，「我入行前揸過貨車，不過唔係貨Van，係密斗。」
仲曾經係華弟，「嗰陣一考到牌就出咗架PGM3！」哦，烈火戰車！「唔係，我再早啲，《天若有情》！」
不過，最後結束電單車生涯，唔係因為吳倩蓮，係因為縱火狂徒，「嗰晚諗住去踢波，落到街，見到架車俾人燒咗！」
佢今日唔係西裝友裘俊，亦唔係貨Van佬包國仁。而係平時揸7人車嘅FamilyMan，扮緊跳上開篷車嘅徐榮。
文：嘴嚼爺
攝影：林栢鈞
值得一讚嘅係開篷好快，10秒內搞掂。
鐵騎士決戰香蜜湖
「就像隔世人期望，重拾當天的一切……」嗰陣袁鳳瑛首《天若有情》，勁過旺角行人專用區啲易拉架推銷員，大把無知青年俾佢同華弟導咗去考電單車牌。「係啦，《天若有情》，咁就中咗招，19歲就去考牌。嗰陣10幾20歲一味要型，實情次次出完街都成身汗，鬼咁辛苦。」
估唔到《同事三分親》個裘俊、即如今《畢打自己人》個包國仁，現實中鬼咁浪子就真，「不過3個月就炒咗第一架PGM，仲入過幾次醫院，最勁嗰次斷咗隻左腳。」堅，堅過華弟，「真㗎，落場鬥過香蜜湖㗎，𠵱家都想去珠海賽吓，聽講幾千蚊包埋大偈有埋車，仲好似有『皮』㖭喎。不過咁耐無揸，唔知仲識唔識，哈哈！」
天若有情烈火戰車之後，徐榮亦逃唔過鐵騎士妥協嘅命運，「Fairing，之後街車，最後綿羊……舒服嘛！我早3幾年前都仲揸緊電單車，夜晚喺電視城走，行環保大道晚晚俾狗追，係呀，嗰陣好多狗夜晚無嘢做。」
最後，仲俾縱火狂徒結束騎士生涯，「嗰晚好似諗住去踢波，落到街見到條冷巷好多警察，行入去望望，架車燒淨棚骨，之後就轉揸7人車Stepwagon。」
SecondCar要大馬力
「揸四個轆就無乜難忘嘢喇，好平淡，都係載吓屋企人，飛車年紀都過咗，俾人影相都好少喇……touchwood呀！𠵱家最緊要安全，揀車實用之餘就最緊要慳油。」不過憑《同事》彈起，再寄望《畢打》幫佢上多層嘅徐榮，揸車同演戲都一樣，心裏面仲有一團火，所以前幾日問佢想試咩車，佢喺電話度話要跑車，「都想有架雙座跑車做SecondCar，得閒遊吓車河就Perfect喇。」借嚟呢架開篷豐田Soarer，車上有一台4.3公升V8引擎，280匹，後座又窄窄哋，基本上可以當佢雙座咁玩，勉強滿足到徐榮啩？「不過架車都幾勁，4千幾c.c.，快！係囉，我唔係好識形容車，哈哈哈……」佢仲話內櫳嘅裝飾同皮座幾靚幾舒服，不過，似乎佢都係BuyHardcore跑車多啲，「如果揀SecondCar對馬力就會有要求喇！LotusElise啦，棍波好玩；新款GT-R，個尾都幾靚。電單車就Yamaha架R1，或者得吉利嗰隻999。」得吉利即係Ducati，「揀車係咁，有Budget就多選擇。」
咁你咪好多Budget？「唔……呢幾年畀心機，努力啲啦！」
豐田Soarer規格表
引擎：V8DOHC
容積：4,292c.c.
馬力：280ps/5,600rpm
扭力：43.8kgm/3,400rpm
傳動：五前速自動波
售價：$269,000起
查詢：R-PROShop
（28772700）
