退下火線嘅范太唔使主持立法會會議，去完歐洲度假，返港後噚日出席公開活動，教男人做人嘅道理，如果唔想身邊人咁多爭拗，就要細心，「要知道佢哋想要乜，唔係你想要乜。」又話做大嘅，要識得在適當時間收聲，聽吓人講嘢，唔好口水多到要用口水肩。富豪家事全城熱話，唔通范太想做和事佬？
所謂清官難審家庭事，范太雖然係人大常委，對富豪家事都理唔到咁多，佢噚日出席學友社傑出學生領袖活動，講做好領袖條件，若有所指向煲呔教路。范太話好領袖固然要有人賞識，不過「上面」有人支持你都唔夠，「一定要攞埋下面啲人嘅支持。」呢番道理，范太早啲教老董咪好囉。
范太：咪亂拋浪頭
𠵱家政壇好多人鍾意將「阿爺」、「上面」、「西環」掛在口邊，范太身為國家領導人，指示大家咪亂拋浪頭，「如果你做嘢時吓吓都出『聖旨』、出『王牌』，同你做嘢嘅人會唔開心。」曾被譏為「香港江青」嘅范太，對毛主席理論認識原來頗深。佢話好領導要相信群眾力量，尊重群眾，「要知道佢哋想要乜，唔係你想要乜。同人相交、同人做嘢，心急係唔得嘅。」
范大又話，做大嘅，唔可以一個人話晒事，應該識得收口做聆聽者，決策過程中，最好令團體中每一個成員都覺得有份參與，鼓勵大家講意見，「唔講都要令佢講，當佢參與討論時，就有參與感、有歸屬感，會出心出力為團隊做嘢。」呢套方法，同毛澤東《關於領導方法的若干問題》同出一轍，老毛話領袖要從群眾中來，到群眾中去，以形成正確領導意見。如果煲呔有讀《毛選》，就唔使狼狽收回生果金入息審查建議啦。
指點完煲呔，范太對另一個男人都有意見，就係立法會新主席曾鈺成，話好彩任內冇人掟蕉，至於曾鈺成堅持唔封咪，更以美國眾議院議長都可以評論政事為例，范太卻踢爆係歪理，因為立會主席唔評論時事傳統，源襲英國議會做法，立法局年代已經咁做，資深議員好清楚，「一路都有呢個歷史背景，我哋係跟英國嗰套，唔係跟美國嗰套。」連范太都咁講，曾鈺成收聲啦！
mailto:[email protected]