地產代理施加入「經濟機遇委員會」，聽講佢自己曾經拒絕邀請，但政府盛意拳拳，於是要畀面。左丁山與代理施曾經有幾次一齊參加高官吹風會，發覺代理施堅信市場理論，言行一致，在吹風會上往往與左丁山成為少數右派，而代理施更右一啲。代理施喺佢張報紙有一個專欄，每日發表之意見與編輯卻相左，有時令人愕然。如此人物，在今時今日之立法會（左派議員佔絕大多數）中，高度政治不正確，例如佢反對最低工資，反對競爭法，反對建居屋，反對首置貸款等等，立場鮮明，民建聯、工聯會、學聯、社民連、街工、泛民主派等議員，一定視之為天字第一號敵人。經濟機遇委員會點解要代理施為委員呢？曾特首咁聽民意（生果金就係範例），搵專講「反話」嘅代理施入會，目的何在？諗唔明。
代理施係絕對理性蓋過感性之人，另一位委員進念胡就係感性多於香港天空上之繁星嘅文化人，在經機會講香港金融中心如何面對金融海嘯挑戰，如何發展新道路，唔知會點講。講香港以後發展創意產業、文化產業，唔係唔可以，不過好似又不對題啫，睇吓施政報告第二十至二十三段，就知道經機會唔似係昔日城大張校長主持之文化委員會，張校長加入經機會，其實比較更適當。
「經濟機遇委員會」係中文名字，英文叫做TaskForceonEconomicChallenges（直譯係：應對經濟挑戰特別小組），在公司管理上，TaskForce有臨時、應變、應急小組之意，係一個專責小組，人要少，開會要多，做事要快，唔可以拖泥帶水。但係「經濟機遇委員會」呢個中文名稱，就冇緊急、特別應變、專責嘅意思。委員會啫，咪慢慢傾囉，機遇喎，碰上則有，碰唔上則無，有乜好講？不如請英文專家陶傑、古德明為呢個所謂「委員會」繙譯另一個中文名稱，以免大家誤會。講番委員會成員，經濟腦袋、理論當然以劉遵義、馮國經呢兩位世界級人物最醒，其他人都係實務專家，要佢哋為香港想出新方向，未免強人所難，況且位位都係大忙人，要佢哋好似TaskForce咁樣密集開會/工作，難啲咯。