立法會噚日通過施政報告致謝動議，煲呔心情可能好轉，下晝落區到觀塘巡視，首先去鯉魚門海鮮檔，唔係開餐，而係睇睇市道。
唔使老闆多講，𠵱家咁嘅市道，仲邊有人有心情食海鮮？煲呔可能都唔好意思空手而回，買咗100蚊老婆餅，算係支持本土經濟。
觀塘人口老化，居民多數唔係有錢人，經濟逆轉好多人叫苦連天，煲呔去到基督教勵行會瑞和街「勵行站」參觀，呢間舖頭仔以賣平嘢見稱，雖然只係做街坊生意，不過都有錢賺，算係有成績社企之一。
之後煲呔又參觀循道衛理觀塘社會服務處嘅食物銀行，佢話希望立法會盡快批出一億元撥款，擴大各區食物銀行計劃。落區收穫咁豐富，使乜開埋啲經濟機遇吹水委員會吖！