廸生創建（113）短短五個月，股價質低72%，周線圖9RSI跌到得番3.5，殘到爆，要昅住。同好多股票一樣，廸生啱啱創出咗近4年低位，技術指標嚴重超賣唔在講，再睇基本因素，集團最新手頭淨現金5.9億銀，每股淨現金1.59元，講緊幾乎係廸生現價（1.70元）水位，而且集團NAV5.3元，現價折讓68%，夠晒折讓墊底。
又廸生股價跌成咁，往績息率高企24厘。環球經濟及消費市道唔多靚仔，又不妨計計數，假定集團09年度（3月底止）派息減半，到20.6仙，但講緊嘅息率回報，仲係高達12厘，仍然吸引到痹。再講，廸生主打亞洲市場，尤其喺祖國，零售網絡擴展到超過230間，有晒網絡優勢。睇好祖國中長線中、高檔消費市場豐厚潛力，廸生價殘，正好提供入市良機。買廸生要長短打，一注擺埋一邊，一注短打，博上番0.5倍P/B，現價都要升36%。
航天錢多防守力強
上年10月，個市炒到火紅火綠之時，航天控股（031）最高位1.92元，當時P/B講緊係接近2.4倍。集團股價1年跌咗84%，現價（0.30元）相對NAV0.82元，折讓上到63%，P/B得番0.36倍，吸引好多。又航天扣埋銀行貸款及其他貸款，今年6月底手頭淨現金高達7.7億銀，每股淨現金等同現價。淨現金比率咁高，現水位防風力應該加強，可以兜番轉。以航天0.5倍P/B做目標，要見0.41元，現價潛在回報率36%，短打有魚有肉。
錢雋