前高官梁展文退休後下海搵真銀，被指有利益衝突，最終同地產商「分手」，事件餘波未了，八方聽聞部份高官好有意見，覺得有人累街坊。
有退休官員同八方講，梁展文事件後，公務員事務局審批退休高官從事外間工作時間好似長咗，以前大約一個月就有結果，𠵱家卻望穿秋水，其中前副廣播處長吳錫輝大嘆唔好彩，由於今年局方拖延審批佢到浸大教書申請，開學時仍未獲批准，令佢同校方大失預算。
退休個案排長龍等批
吳錫輝06年8月退休前休假，隨即申請到大學兼職教授傳媒課程，過去兩年8月入紙申請，最遲9月底就批准，可如期開學，今年佢8月底入紙，點知拖到10月底先批，由於佢教授課程已開課，搞到要搵人代課，有學生以為貨不對辦，提出質疑，令佢勁無奈，「我要親自向學生道歉，仲要安排時間補課。」
據了解由於梁展文事件令公務員事務局局長俞宗怡孭鑊，所以𠵱家各部門都好小心睇快勞，隨時幾上幾落先拍板，積壓個案排長龍，吳錫輝話稍後會去信局方反映意見，佢建議將申請分途處理，「申請做志願機構、學術性工作一條隊，從商下海搵真銀嘅另一條隊，咁做先係科學化嘅管理。」公務員事務局本年1至9月，共批出42宗退休高官從事外間工作申請，審批時間視乎個別申請而定，梁展文申請兩個月獲批。