賤物鬥窮人，呢排個巿差成咁，如果手頭鬆動，真係購買影音產品嘅最好時機。只要主動講價，新機都有得減。好似Canon啱啱出咗部PowerShotSX10IS，係佢第一部有20倍光學變焦嘅「長炮」數碼相機，小藍心郁郁想買。咁啱女友又睇中咗Canon最新款嘅IXUS870IS，想送畀媽咪做生日禮物。小藍咪同女友一齊去殺價囉。
SX10IS同870IS公價分別係3,680元同2,880元。小藍先去鐳射價格，先攞部870IS摸咗一陣，再問有冇得減，對方話減兩嚿水，送埋腳架、4GB記憶卡同電池。我再叫佢攞部SX10IS嚟睇吓，話買兩部有冇得平，佢話SX10IS可以平100蚊，但要一次過畀錢。
免息分期再送4GB卡
小藍咪走去對面百老滙，職員話SX10IS冇貨，870IS賣2550元，又平多100蚊，小藍梗係唔滿足啦。再行去隔籬嘅國美。一貫策略，先問870IS，平到盡都係2,550元。我再話買埋SX10IS。佢話，SX10IS最多減到3,480元。
冇得再減？小藍咪叫佢送啲配件囉，佢話每部機可各送兩張4GB卡、腳架同電池。仲可以免息分期。計一計數，兩部新機加埋平咗近一成，仲有咁多樣嘢送，梗係扑槌啦。各位老友記住，新機都要講價。
逢周五刊出