靠捉鼠響朵嘅立法會議員梁美芬「鼠王芬」，噚日帶同幾百個雷曼苦主殺入中環，巡迴多間銀行示威抗議，要求銀行賠償，不過可能鼠王芬主要喺街市、坑渠搵老鼠，唔係好熟悉金融區街道，老點苦主去錯地點示威，十分騎呢。
拉隊去分行請錯願
雷曼苦主已上街無數次，鼠王芬噚日先首次帶隊遊行，佢一馬當先拎住支咪嗌口號，帶領幾百人浩浩蕩蕩聲勢十足，一行人行到星展銀行皇后大道中分行時，鼠王芬不滿冇銀行職員出嚟招呼苦主接收請願信，大喊銀行速速派人出嚟，一班苦主都紛紛大嗌聲援，要銀行交人。
呢個時候，有人細細聲通知鼠王芬，應該係去星展中環中心總行先啱喎，呢間係分行咋！總行先有人接信，分行冇安排。示威請願都行錯路點錯相，都算滑稽。鼠王芬雖然𤓓咗，不過若無其事，拎起咪同苦主講，請大家移玉步行多兩個街口，去總行先啱，只是苦主群情洶湧，有人更激動到衝擊銀行，同「實Q」推撞，場面十分混亂，幸好警員維持秩序先冇釀成意外。
鼠王芬唔驚老鼠，喺呢啲場面卻十分錫身，一味嗌咪叫大家冷靜啲。去完星展，苦主轉攻渣打，其中一名苦主嚴太表現悲慟，佢扶住鼠王芬膊頭諗住有個依靠，不過最後都係激到暈低，鼠王芬大局為重，對呢啲事處之泰然，繼續帶隊前進，嚴太則由其他人攙扶休息。
鼠王芬同苦主玩轉大半個中環，最後一站係中銀總行，苦主好感激議員襄助，抵佢攞威，苦主大聯盟召集人陳光譽話多謝鼠王芬「棄暗投明」，又指佢已承諾投票贊成引用《立法會（權力及特權）條例》調查雷曼事件，鼠王芬則澄清自己唔係「棄暗投明」，強調一直支持苦主，絕非中途轉軚抽水揩油，又話苦主人人得而幫之，唔應該由個別政黨壟斷，此時民主黨甘乃威剛剛現身，鼠王芬弦外之音，你唔係聽唔出嘛。
甘乃威不甘示弱，即時反擊指「某啲人」乘機「抽水」博苦主好感，不過佢唔會聲討抽油水嘅人。苦主頻頻示威徒勞無功，反而成為政客攞威佈景板，何苦呢！下次應另設「攞威區」供抽水揩油者行埋去，各取所需。
mailto:[email protected]