縱使沒有資格當迷債苦主和股海災民，仍然難免受低氣壓影響，我個人暫時的最大刺激，不是KrispyKreme全線摺起，尚未入冬冬甩就悉數甩底，而是尖沙咀樂道那間常常光顧的公和豆品忽然蒸發，兩星期不見汁都冇得撈。我們這種口大食四方的無廚之徒，東家不食食西家，逢場作戲見一個愛一個，早就學得很瀟灑，輕易不會與任何食肆動真感情，然而摸門釘的滋味十分惡頂，興沖沖去到乍見鐵閘拉埋，就像熟朋友一聲唔出和你絕交，連質問「點解」的機會也沒有。
因此特別珍惜眼前人，吃起來凶神惡煞，盡情放大夾縫樂趣，感官世界廣納新移民。適逢本期《TimeOut》推介十大漢堡包，原本對煎牛肉餅不置可否的我，即時被點中穴道，按圖索驥大開食戒。其實以前在美國唸書的時候，有一個時期天天出入柏克萊大學太平洋電影圖書館，趕場趕得裙拉褲甩，常常以漢堡包充饑──那家學生雲集的餐室叫Kip's，想起來都流口水。近年在香港一嚐豬扒包驚為天人，恐怕是喚起了潛意識的溫柔，餓過頭豬牛不分，認錯了牧場的親戚。
這天又在大坑歎全港最美味豬扒包，味蕾坐沙發椅之餘，耳朵還吃冰淇淋，廿幾皮雙料娛樂，堪稱消翳解悶的及時雨。隔籬檯三個麻甩佬大談治家心得，先分析兒女債的正確償還方式，繼而討論夫婦相處之道，性別政治意識全盤扭曲，還打腫臉皮充民主：「咁多少都應該畀番啲自由個老婆嘅。」另一個舉腳贊成：「咪即係話畀佢空間囉。」誰不知先頭那個拍案而起：「畀老婆通姦？仲成世界嘅？」哈哈哈，現在你知道我的趣味可以有多低級了吧？