美聯（1200）主席黃建業上兩個禮拜俾神秘炒家狙擊，呢位有「窩輪王」稱號嘅梁向榮，兩個禮拜內5度增持美聯，以每股平均價2.819蚊，合共掃入5239萬股；上個禮拜四更揮低黃主席，成為美聯最大股東，手揸12.11%股權。當時唔少人都奇怪，黃建業咁樣俾人落面挑戰，點解唔反擊。
直到今個禮拜一，黃建業終於有反應，連續3日密密吸納美聯，合共買入2124萬股，每股平均價2.478蚊，到禮拜三揸住13.03%反超前，重奪美聯最大股東。
總結呢兩個禮拜嘅美聯攻防戰，雖然梁向榮先攞頭彩，但講到投資眼光就唔及黃建業，黃主席趁早幾日全球恐慌大冧市，先執平貨增持美聯，每股平均價比梁生平34.1仙。所以話面子呢家嘢唔重要，最緊要睇啱時機，唔係話人哋同你爭就要搏命嘅。
黃建業3日賺1703萬
噚日美聯收報3.28蚊，短短幾日股價急升四成，黃主席增持嘅股票，賬面賺咗1703萬銀，眼光果然厲害。