生果金鬧到滿成風雨，連公公婆婆都要上街遊行示威。雖然最終曾特首讓步，將生果金加到一千蚊，不過對於你同我，未夠六十五歲，想拎都未有得拎。但另一款生果「柑」就關我事喇！皆因𠵱家正是「柑」當造季節，無論大陸、日本定台灣，大把得你揀，仲可以入饌，做番幾味自家菜式㖭！
記者：劉明慧
攝影：伍慶泉、楊錦文
食譜及示範：盧家傑@Munch行政總廚
（尖沙嘴諾士佛臺1號1樓23177887）
溫州蜜柑出自何處?
其實溫州蜜柑是由日本智慧和尚由中國溫州市帶返日本加以改良，到1876年明治維新時期，再由日本九州薩摩國傳入美國。𠵱家分佈很廣，南至澳大利亞及新西蘭，北達俄羅斯黑海沿岸。其中以日本栽培最多，目前日本70%左右的柑是溫州蜜柑，屬世界上溫州蜜柑產量最多的國家。
教煮
盧家傑
17歲入行，有13年經驗，遇上西班牙師傅，輾轉間在意大利、西班牙和法國餐廳工作。年紀輕輕便取得法國藍帶勳章，現時在有機餐廳Munch當行政總廚。
「柑好少拎嚟煮，因為只得香甜味，最多用來做甜品，用法大致同用橙差不多，不過橙就多份酸味，會比柑更突出。如果煮肉會當成照燒醬或蘸點嘅汁嚟用。」
教揀
永富輝哥
「𠵱家呢個季節柑就最當造，大陸、日本、台灣，遲啲仲會有澳洲、以色列出嘅柑。日本柑就甜啲多汁啲；大陸柑就大個啲但亁身，不過𠵱家多人買台灣柑；日本柑就送禮多。」
生果柑要識揀
柑，早在唐朝已經有記載，有成一千三百多年歷史，所以品種多，要揀都揀到眼花。在香港見得最多的是祖國蘆柑、台灣招柑及日本蜜柑，但大家都是柑，究竟分別喺邊呢？
祖國組
蘆柑$10/4個（a）
無咗潮州柑，巿面就多咗漳州蘆柑。價錢平，因為祖國有大批種柑果園，而柑皮厚，剝皮有少少難，入口亁身無咁多汁，所以比較平。
新會柑$5/11個（c）
新會柑是當地的寶，因為好多靚陳皮都是出自新會柑。要認佢都唔難，綠色青BB細細個，街巿果欄實見到，不過果肉好酸，基本上唔會食，只會用來榨汁。
寶島組
寶島柑同福建柑屬同品種，都叫做招柑，而且同橙雜交，所以個樣較似橙。
台灣柑$5/個（a）
台灣柑味道比蘆柑甜同多汁，屬中價柑。𠵱家買可能太早，要放係屋企2至3日就會變橙紅色，即是熟透可以食。
日本組
日本有分早生柑同晚生柑，早生柑係9至10月尾；晚生柑是12月尾，而且還分露地種植同溫室種植，溫室種的當然較貴。
日本清見蜜柑$52/3個（a）
蜜柑多汁清甜無核，而清見蜜柑的皮會帶少少綠色，皮比較厚同粗，其實已經熟透食得，唔好以為綠色仲未熟，如果等到無晒綠色，就熟得滯唔好食。
佐賀柑$228/約10個1盒（a）
佐賀柑係蜜柑一個好出名嘅品種，皮薄肉紅，入口甜又無渣無核，而且係溫室種，隻隻都有個袋包住種，所以特別貴，日本人多數買來送禮。
愛媛柑$25.5/8個（b）
水份多，無核，柑味都濃，皮黃中帶少少綠色，體積比較細。
日本蜜柑$16.8/10個（b）
最常見到的品種，細細個，比愛媛柑更青色，入口甜味較淡。
和歌山蜜柑$25.8/8個（b）
和歌山有田種植，屬露地種植最有名的品種。
福岡柑$48/5個（a）
味道似佐賀柑，皮色帶黃，無佐賀柑咁紅，於戶外種，價錢較平。
煙三文魚芝士柑柚沙律
0hr25min
製作難度：★★☆☆☆
沙律入口Creamy，柑就香甜多汁，當作醬伴多士同吃，味道超匹配。
材料
煙三文魚100克、忌廉芝士50克、忌廉1湯匙、柑1個、黑胡椒碎/香草/沙律菜各適量
做法
1.將柑起肉、皮磨成茸備用。
2.忌廉芝士及忌廉放入攪拌機內，攪至軟身，加入已切粒煙三文魚、香草、柑皮茸及黑胡椒碎攪勻，做成煙三文魚芝士醬。
3.煙三文魚芝士醬放入圓形金屬模中，放上柑柳及沙律菜即可。食時可伴上薄多士。
貼士
忌廉芝士及忌廉攪勻前，先放在室溫30分鐘待其變軟，這樣會較容易打勻。另外倒入模後，雪10分鐘味道會較好。
薑汁柑柚醬燒鴨胸
0hr45min
製作難度：★★☆☆☆
將柑起柳榨成汁，再煮成照燒醬抹在鴨胸上，鴨胸煎到七成熟，入口有柑的甜香味，亦令肉鬆軟多汁。
材料
鴨胸1片、鹽/黑胡椒碎各適量
薑汁柑柚醬料：柑汁3/4杯、橙酒3湯匙、有機蜜糖3湯匙、薑50克、芥末1湯匙、柑皮1個
做法
1.將薑汁柑柚醬料放入鍋內，用慢火煮至剩三分一份量，攤凍備用。
2.鴨胸於鴨皮的一面𠝹上格仔紋，用鹽及黑胡椒碎調味。
3.鴨胸用慢火煎至兩面金黃色，搽上（1），放入200℃焗爐焗4至5分鐘至七成熟，切片上碟即成。
貼士
鴨胸要先煎皮邊，見收縮及出油便可反轉煎另一邊。
柑柚巴菲伴椰汁有機薏米
0hr50min
製作難度：★★☆☆☆
巴菲質感似沙冰又似雪糕，味道甜甜酸酸，而薏米非常有嚼勁。
材料
有機薏米1/2杯、椰汁1/2杯、有機蜜糖2湯匙、水1杯、柑2個、乳酪1杯、士多啤梨5粒、藍草莓12粒、芒果1/2個
做法
1.將椰汁、水及有機薏米放入鍋內，用慢火煮30分鐘，攤凍備用。
2.柑起肉，與乳酪一起放入冰櫃雪至硬身，兩者取出加入有機蜜糖，放入攪拌機內打成巴菲。
3.將（1）加入芒果攪勻，放入杯的底層，淋上（2），最後加士多啤梨及藍草莓即可。
貼士
柑肉及乳酪打勻前要雪至硬身，會較容易打起；而打成巴菲後，再雪15分鐘，巴菲會較企身及好味。
查詢：
（a）永富食品公司27182688
（b）一田百貨26941111
（c）旺角街巿