何謂文化差異？在東方，七月十四盂蘭節，係用嚟驚；在西方，鬼節，係用嚟玩嘅。因此在歐美等地，所謂猛鬼古堡、酒店，不但沒有像東方人咁棹棹忌忌，反而仲會在自己網站大肆宣揚，一到Halloween更勁搞撞鬼團，慌死你唔知佢有鬼！
記者：劉嘉蕙
呷啡湊鬼
MuncasterCastle，可能係全英國最猛鬼嘅古堡。建於十三世紀，幾十家人住過，最出名是一男一女鬼，男者TomFool，喜歡半夜斬柴、踱步、亂嘈、開門；女者Mary，細路女，常於花園出沒。聞說住客入到古堡，必感寒氣纏身，猛到連英國伯明翰大學都要在此開壇授課，研究靈異現象。古堡主人從不忌諱，仲要沾沾自喜搞個GhostSits湊鬼團，一至六人成行，入住全堡最猛TapestryRoom，大會先預備鬼古熱身，跟住提供咖啡等你精神奕奕守夜，以防錯過精采時刻。古堡同時是一個貓頭鷹基金搞手，提供助養計劃，一年助養費由$500-$1,250不等，視乎貓頭鷹大小而定。若想進一步了解古堡，網上有大量GhostSitters經驗分享，好似揀菲傭咁專業！哈囉喂期間，古堡會提供探鬼半天遊，每位約$125起。
地址：MuncasterCastle,Ravenglass,CumbriaCA18IRQ,UnitedKingdom
網址： http://www.muncastercastle.co.uk
入場費：湊鬼團平日每組約$4,860
紫黃衫防邪
出外旅行不想撞鬼，香港淳道玄學總會會長方海閱師傅醒大家幾招防邪法，以求心安。
1.入房門前敲三下門，以示尊重。
2.深黃及金代表神、紫代表大仙，多穿此色可防邪。
3.防被鬼壓，可在手掌及枕頭畫四直五橫陣，即井形圖案。
4.如有宗教信仰，盡量帶宗教飾物及經文去旅行。
凶宅嘆早餐
故事發生於1892年，美國麻省一間大宅，搵到一對夫婦被斧頭砍死嘅屍體（阿爸眼珠仲被挖埋出嚟！），現場只有32歲阿女生還，呢個阿女，就係LizzieBorden。Lizzie最終被判無罪釋放，但從此成為美國犯罪學紅人。有人將佢嘅故事搬上舞台，有人開giftshop。最正係可以去凶宅B&B，早餐內容同命案當日的一模一樣，包括香蕉、曲奇，同咖啡……
地址：92SecondSt.,FallRiver,MA,USA
網址： http://www.lizzie-borden.com/
雙人房每晚約$1,170起
被詛咒之古堡
新西蘭唯一古堡LarnachCastle，美得像人間仙境，亦同時妖氣衝天！堡壘建於1871年，係富豪WilliamLarnach送給老婆的禮物，Larnach太38歲就死去，William再娶她同父異母的妺妹續弦，結果這位阿妹同樣在38歲過身，邪！自此開始盛傳古堡被詛咒，直至現任堡主MargaretBarker買下，將古堡改裝成觀光點，鬼古一直未停過，難得MargaretBarker大方任講，仲在網站披露心情，叫人上YouTube睇有關影片，表示「如果WilliamLarnach見到我哋𠵱家咁樣，一定好開心！」簡直匪夷所思！
地址：145CampRoad,OtagoPeninsula,POBox1350,Dunedin,NewZealand
網址： http://www.larnachcastle.co.nz/index.pasp
雙人房每晚約$1,056起
其他鬼怪旅館
紅房異象
蘇格蘭愛丁堡BorthwickCastle內的RedRoom曾有女子切腹自殺，MaryQueenofScots亦曾多次入住，聞說客人入住RedRoom必會發現異象，此房每晚約$2,100起。
查詢： http://www.borthwickcastlehotel.com
士兵被殺
OldeAngelInn在加拿大安大略湖南岸，兩百年前，上尉ColinSwayz於地下室被美國士兵殺死，此後住客投訴半夜聽到怪聲。現住客若成功度過一夜，可獲勇敢證書一張！雙人房每晚約$714起。
查詢： http://www.angel-inn.com/
夢露生前蒲點
HollywoodRooseveltHotel是瑪莉蓮夢露生前蒲點，聞說泳池邊某套房的掛牆鏡最邪，夢露小姐都曾照過，又傳已故男星MontgomeryCliff會出現吹小號。雙人房每晚約$2,480起。
查詢： http://www.hollywoodroosevelt.com
吊死180犯人
英國威爾斯TheSkirridInn於十二至十七世紀曾是法庭，吊死180名犯人，寃氣重，連英國電視台LivingTV都做過特輯介紹，雙人房每晚約$1,020起。
查詢： http://www.skirridmountaininn.co.uk
鬼知你猛鬼
除了古堡酒店外，以下是江湖傳聞三大「唔講你唔知原來好猛鬼」之地，最可怕係全部都是港人至愛……
六本木山
在六本木山發生的邪氣事件中，最經典係3年來發生33宗旋轉門夾小童事件，受害者全為2-8歲小朋友！其實六本木山前身為神社及墳場，明晒！
池袋
原來二戰前，池袋是刑場、殯儀區，有名望之人會被送去池袋斬頭。時至今日，池袋近民居一帶仍有殯儀業集中地。
曼谷蘇凡納布米機場
機場未開幕已意外頻頻，官方請了99名高僧做平安法事，點知法事進行期間，居然出現鬼上身事件！據說機場前身為墳場，因「移交」做得唔足，激嬲「人」喎！
