呢排拍檔牽牛喺〈早飛2+5〉好fit，周二重心推介里昂中到應，連條3串1過關都中埋；畢傑身為本欄主人，今次點都要畀個交代牛兄。今期博波圖作客搵拿華祭旗，重槌1.53倍W。
大把人賽前問我，波圖連輸兩場喇喎，仲貼？係。我係都要貼。波圖先喺歐聯主場0:1輸畀基輔戴拿模，之後返聯賽主場再輸2:3畀歷索斯，好似近況唔係幾掂。但係畢傑當然有做足功課，我翻查呢支喺葡超玩晒嘅班霸，近幾季都未試過3場內贏唔到，我講緊嘅係包括聯賽、歐聯同葡盃之內。
未試過3場贏唔到
即係話，當波圖連和或連輸兩場之後，第3場一定可以贏波，數據幾強㗎。更邪嘅係，波圖對上一次兩場連敗，已經要追溯至06/07球季嘅1月尾、2月頭；當時佢哋連輸利亞拿及艾馬多拉後，咁啱第3場就係對拿華，嗰陣主場就大勝4:0。
當然，數據只係加強投注信心之一。除咗往績，人腳上波圖都可以「夫添」，路爾斯干沙利斯、利辛度盧比斯同魯爾梅利斯等主力全部列陣，就連門將希頓同後衞富斯尼亦可傷癒復出，誓要喺拿華身上止跌。
拿華遇Big3未贏過
拿華主場確實係幾硬淨，不過只係專恰其他球隊，一旦遇上葡超Big3波圖、賓菲加及士砵亭，佢哋自從05/06球季升班以嚟，聯賽主、客對住Big3只得4和15負（包括上場1:2不敵賓菲加）。唔好忘記，當中4場和波係喺賓菲加同士砵亭身上所得，若計埋盃賽在內，拿華近7次對住波圖全敗。周六一於重槌客W啦！
〈早飛倉〉
主菜：星期六59波圖勝（1.53）@1,000
渾水摸魚過關：星期六55尼斯（平）x星期六59波圖勝[-1]（2.75）x星期日66富明尼斯大（待定）3x1@500
今日早餐價錢：-1,500
上日賺蝕：+4,269
早飛倉結餘：$95,469
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周末早飛超級重心
星期六48 卡廸夫城大（1.82）
第3位卡廸夫城迎擊榜首狼隊，兩隊前線極「弗」，狼隊作客7戰更開6「大」，入得又失得。
星期六55 尼斯（平）（1.72）
尼斯主場平手盤低水好快啲買，轉盤就無謂。事關尼斯今季主場未輸過之餘，對上3季都喺主場砌贏對手。
星期日66 富明尼斯大（待定）
里約熱內盧打吡大戰，又是聯賽護級大戰，可藉兩軍大勇射手華盛頓及艾蒙度，合演入球騷。
難啃早餐
星期六7 愛華頓勝（1.68）
上仗梅開二度的富咸前鋒安祖莊臣今役倒戈，愛華頓上仗勝保頓1:0其實表現一般，難言勝。