先嚟個冷知識──響屁唔臭臭屁唔響──原來係堅㗎。響屁含較多二氧化碳同氫氣，噴氣量勁但唔多臭；臭屁則含較多甲烷，噴氣量少但超臭。每人每日最少放五次屁，響又好臭又好，難保唔會俾人發現。五次出醜機會，點化解好呢？
記者：吳允冲
攝影：王文忠
模特兒：Kiko（StageModels）
插圖：吹（mailto:[email protected]）
呃男友入被竇
Freeze甄穎珊：「最鍾意整蠱男朋友，兩個人瞓埋一張床，我突然間放咗個好臭嘅屁，然後同佢講：『講個秘密畀你知吖。』男友一伸個頭埋嚟，我就塞佢個頭入被竇。」
屁王笑爆班房
DJBob：「細個腸胃差，個個叫我做屁王，記得五年班上堂做Listening，忍唔住呠咗一聲，個個同學望着我，連Miss都指着我話：『你唔好再放屁呀！』全班靜晒，點知我又放多個響屁，成班同學狂笑。」
DJ後台臭到寃
啤梨：「喺頒獎禮突然放屁，我唔熟側邊啲台灣Artists，淨係識曹格，惟有淨係同佢自首。」DJ思敏：「頒獎禮後台被一陣屁味籠罩，張敬軒都唔敢出聲，惟獨高皓正大叫：『嘩，好臭啊！邊個放屁？』」
頭頂放屁無得避
DJ林柏希：「以前喺英國讀書，啲鬼仔食得薯仔多，啲屁話放就放，好誇張㗎！有次我喺Theatre，後排有人起身去洗手間，經過我後面，突然喺我頭頂放咗個屁。嘩，真係臭到無人有，避都避唔到。」
直播室炒蛋
DJ路芙：「就啱啱之嘛，喺直播室同徐小明做訪問，我個肚唔舒服咕嚕咕嚕咁，連續呠咗兩聲，都幾大聲，好彩嗰個係響屁唔臭，佢戴住Headphone應該聽唔到，我就梗係好尷尬啦。」
自保八式
有屁確實要放，因為忍屁會導致腸內積聚氣體，令腸臟蠕動變弱，容易造成便秘。不過做人要講禮貌，喺唔適當時候同場合，奉勸急都要忍一忍，練不成忍屁神功，都要化屁為夷，家陣醒你自保八式，萬一忍唔住當眾放臭屁，都唔使搵窿捐咁失禮。
屁聲變笑聲
DJ胡凱晴：「有個朋友最鍾意喺人面前放屁，放完仲要特登撥啲臭氣埋人哋身話：『係咪好臭呢？』」頓時化屁聲為笑聲，高招！
一屁三放
瑪姬自稱放屁從來無人知：「要鬼祟！籮柚貼實張凳，慢慢將屁分三次洩出嚟，唔會呠一聲，肯定神不知鬼不覺。」
放火辟味
密室放屁，最好劃火柴辟味，燃燒空氣消除臭味。兩蚊一盒火柴好使好用，使乜用香薰蠟燭？強烈推薦屁王隨身帶備一盒。
虛則實之
學三姑吳君如話齋，有屁要放就要認，臨放屁前大大聲講：「放番個屁先。」放得大方有型，兼收虛則實之之效，邊個放，有排估。
冚實被竇
同Honey瞓埋一張床，放無聲屁，記得即時冚實張被，唔好留空隙位俾臭味滲出，等一陣，被竇裏面嘅臭屁味，就透過床單被鋪四散。
打死唔認
人群中放毒氣，誰是屁主得個估字，走開玉女路線嘅話，堅持死都唔認，扮無事發生，記着表情要淡淡然，唔好出賣你自己。
鈴聲掩護
放響屁？唔使驚，最緊要有聲音掩護，襯電話響就即放，千祈唔好以為將鈴聲轉做放屁聲會呃倒人，你覺得好笑？其實仲𤓓。
惡人先告狀
先發制人，放完屁即刻指住隔籬位仁兄，嫁禍畀佢，記得語氣要堅定，講大話咪眨眼，不過要有第三者在場先適用。
放屁顯本性
某日，你同陌生人共處一𨋢，放咗個無聲臭屁，成𨋢人都聞到，要求放屁者自首，你會點做？
A.同其他人商量誰是真兇。
B.嫁禍畀人，搵替死鬼。
C.勇敢承認，一人放屁一人當。
D.靜雞雞再放多幾個屁。
分析
A.重情重義：你對伴侶、家人同朋友都好有愛心，但唔敢將個「愛」字講出口。
B.重視私人空間：你唔重視工作和與人溝通，鍾意我行我素，優哉游哉一個人生活。
C.注重外在美：你充滿個性，對一切事物都好執着，係喜歡追求夢嘅理想主義者。
D.追求物質：你認真工作，收收埋埋儲落唔少錢，不過缺乏幽默感。