陳水扁一家貪污之極，如果喺香港有如此人物，老早判咗監，但台灣冇一條「財富與官職不相稱」嘅法例，陳水扁可以大搞障眼法左閃右避。有一位台灣報界資深記者同左丁山講，陳水扁嘅策略係將所有貪財之事，推晒畀老婆吳淑珍，因吳淑珍不是公僕，兼且身子弱，台灣檢查官奈佢唔何，一旦逼得太緊，吳淑珍玩一招自殺不遂，入院治理，反而會引起同情㖭。
最初左丁山唔信，但睇吓台灣居然有幾十萬人（民進黨宣稱）上街遊行反馬英九，順便挺扁，台南又有人追打大陸海協會副會長張銘清，咁就冇法子唔信，起碼有一部份台灣本省人全無現代文化，係屬於台獨病毒入腦，不顧一切之類，冇人搞得佢哋掂。陳水扁最懂得利用呢批人，不愧為台灣一代梟雄、厚黑學大師。台灣大教授龍應台到港大講人文、講文化，不如請佢講一課為何部份台灣人如此無文化，竟然視貪污腐敗總統為英雄。
碰啱教授Ｌ為台灣名教授（傳媒）接風，家中設宴，左丁山恭陪末席，於是問吓呢位國民黨籍嘅教授Ｋ關於馬英九之事，Ｋ教授話鷹派台獨約佔台灣5%人口，思想僵硬，無可理喻，馬英九想盡辦法，不能動佢哋分毫，反而在reach-out過程中，得失咗國民黨藍營人士，實在非常頭痛。另一方面，台灣傳媒報導陳水扁事件，過份進取，有違反人權之嫌，妨礙司法獨立。呢一點，我哋有同感，因為台灣有唔少名人受到調查，或者係爆料，都會唔收口咁高談闊論，視法律調查如無物，但又唔見有政府檢舉控告之，傳媒於是爭相報導，懶理人權與司法。呢方面，香港人就非常非常乖咯，政府機關為某事立案後，當事人會立即收口，只向當局提供資料，即使傳媒大做文章，報導諸多猜測，對當事人嘅形象不利，當事人一概閉口不談，此乃香港人遵守法治之文化也。最煩嘅就係弱勢特區政府漸失公信力，立法會竟然成為正義象徵，猛咁話要調查這調查那，似乎立法會之最大工作唔係立法，而係監察行政與搞調查委員會，與政府監管機關爭奪調查權，豈不是浪費公帑，浪費時間！