金融海嘯搞到西方各國政府齊齊出手介入，唔再顧得經濟自由唔自由，噚日恒隆地產（101）主席陳啓宗話：「西方國家欠我哋香港人一個道歉，港府98年入市都係為保持市場穩定，但當時俾人鬧到暈，今日佢哋都咁做，仲犀利十倍。」佢爆話早前寫咗封信畀佢老友記聯儲局前主席沃爾克(PaulVolcker)講呢個問題，對方回信話，要代表所有曾批評過香港嘅美國人，向港人道歉，陳啓宗好開心咁話：「咁好極啦。」
另外，唔少富豪炒燶「Ikillyoulater（Accumulator）」，陳啓宗話，之前好多人向佢同公司推銷，不過自己睇到「打晒問號」，所以「睇唔通就唔買」。咁有冇富豪朋友俾人kill咗？佢就話：「係都唔話畀我知啦！」
至於大陸樓市，佢話呢兩三個月都有同內房股啲老總食飯，係邊幾個就唔講嘞，不過個個老總都話公司冇事，班老總走咗，陳啓宗同幾個恒隆高層包括吳士元你眼望我眼，齊齊話：「都唔係幾信得過！」