鬼眼老竇：「陰功囉！班美國妖MSN我，話佢哋終於等到萬聖節，可以出街攞糖食，仲鬼咁興奮！」
鬼太郎：「吓？一晚咁多？隔籬盂蘭節鬼門關都開一個月啦！我哋日本代表嘅妖怪遍佈全國，365日日光日白周街走嚇人，夠晒狼死！今個月26日嘅『境港妖怪鑒定考試』，仲有六百幾個莘莘學子要嚟考試做博士！我哋班妖怪唔只識攞糖食舔叉燒，起碼識整整燒餅、拍戲同打棒球，仲好有文化㖭！」
記者、攝影：陳慧敏
鳴謝：中國地域觀光推進協議會、日本國家旅遊局
紀念館撞鬼
我們的老爹水木茂，今年都86歲囉！剛在《BigComic40周年紀念號》中宣佈再開連載《遠野物語》，將「日本民俗學之父」百幾二百隻妖怪的故事又畫一次！
點解佢畫鬼都畫到咁紅？去鳥取縣水木茂紀念館睇吓就明。老爹早年在南太平洋戰爭中被美軍炸斷左手，得島上的居民救起，睇埋一堆印尼、泰國等妖怪大全，返到日本就開始畫漫畫。佢嗰本《戰爭與日本》就是重現當年戰爭的殘酷，因寫嘅都係佢親身經歷，所以除得到講談社漫畫獎外，仲得日本政府的紫帶獎同旭日獎。1960年《怪怪怪之鬼太郎》正式發表，68年則變做動畫，跟住每10年就會翻新一次。館裏除咗有我哋嘅solo介紹外，仲有以我哋個鬼樣做藍本嘅玩具、老爹嘅真迹，同敍述當年老爹組織業餘棒球隊Kitarous（鬼太郎隊）嘅事。
水木茂紀念館
地址：鳥取縣境港市本町5番地
開館時間：9:30am-5:00pm（周二休館）
網址： http://www.sakaiminato.net/mizuki
鬼太郎列車
網頁： http://yonago.sanin.jp/p/welcome/access/jr/10/.
鬼街狂奔
妖怪橫町即境港水木茂之路
鬼太郎：「班香港記者得一個鐘喺條街度，睇得個館嚟又要出街影相，影得相嚟又想買嘢，買得嘢嚟又想食嘢，結果變800米鬼街狂奔！一個鐘頭唔夠㗎！平時我哋唔會齋留喺館內，外面800米長嘅妖怪橫町，有120隻同伴雕像跟大家影相，仲有好多印住我哋鬼樣嘅衫褲鞋襪手袋公仔等你買返屋企。紀念館出面嘅妖怪實驗室，售賣老竇嘅眼珠麻糬，咬一啖滿滿嘅紅豆慢慢流出，真係好正！鳥取呢度以前唔係好多人，但我哋都會四圍走同四處埋伏嚇人。因為我始終都係主角，所以最多細路要同我影相，而我嘅同伴亦會突然跳出嚟，有時仲會請你食豆腐。但我唔明點解最多人想等鼠男拉人力車，佢會突然放屁口又臭，居然紅過我這個主角，日本人嘅癖好真係怪！」
任試關西名物
距離鬼太郎的妖怪橫町約30分鐘車程，有座簇新城堡，導遊給我們15分鐘入去買手信，原來這裏集合關西大部份名物的小食店，且還統統放題任食，讓你慢慢試清楚，好吃的即集中火力狂掃，將此處放在行程最後一站解決手信問題，好過去到機場亂咁買。
和果子壽城
地址：米子市淀江町佐陀1606-1
電話：（81）8-59394111
查詢： http://www.okashinet.co.jp/kotobukijo/
全個日本都有鬼
除了水木茂紀念館跟妖怪橫町，街尾仲有個妖怪神社，有鬼太郎會幫你開運！然後去到東京，富士急遊樂場個鬼太郎館，到今日依然人氣大盛。因為水木茂先生住過調布市，市內的深大寺也在03年開了「鬼太郎茶屋」，讓你可衝入妖怪屋同眼珠阿爹一齊飲茶。
鬼太郎茶屋
地址：調布市深大寺元町5-12-8
網頁： http://www.youkai.co.jp/chaya.html
妖怪神社
地址：境港市大正町
網頁： http://www.yo-kai.net/
出門提一提
簽證：持BNO及特區護照毋須簽證。查詢：25221184（日本領事館）
機票：12月15日前乘國泰航空直飛福岡，票價$3,200起。查詢：27471577（國泰航空）
自遊行：國泰福岡二人同遊三天之旅（FUAP03M9A），價錢$3,699起。查詢：36920888（東瀛遊）
貨幣：100日圓約兌8.018港元
電壓：110V，兩扁腳插座
查詢： http://www.jnto.go.jp.（日本國際觀光振興機構）
下周日本鳥取天晴，12~24℃
