市道差，裁員潮浪接浪，人人自危，俾老闆屈敢怒不敢言。唔想俾人恰，要適當地發惡，起碼個人要夠硬淨，咁先無人敢搵你笨，仲可以宣洩壓力㖭。不過可惜，呢個世界唔係人人惡得起，所以發惡都要學，今日就搵嚟無記三大惡人教大家發惡，學嘢啦喂。
記者：周靜雯
攝影：陳盛臣、楊錦文、譚盈傑
鳴謝：玄學家麥玲玲、臨床身心行為學家李寶能
發惡分真假
發惡性質，可分生理同心理兩種，前者為人暴躁、肝火上升，係打從心底發乎自然嘅惡，降到火，心情自然靚番晒；後者本身性格妒忌心重、自我保護心太強，希望透過聲大夾惡彌補自卑感。發惡鬧人減唔減到壓呢？臨床身心行為學家李寶能話：「減到！不過發惡有分真假，真惡鬧人會消耗身體能量，怒氣只會越積越多，越鬧人壓力越大，情況惡化只會激到嘔血；假惡發得多又會變成癖，以為發惡就會對自己有利，最終損害自己人際關係。」咁即係點？「即係要發乎自然，俾人恰俾人屈，壓力積聚到某一點就要爆出嚟，唔好谷住谷住，發完惡心情輕鬆。相反，成日發埋啲無謂脾氣，心火咁盛，又點會開心？」一句到尾，適當時候發惡可以舒緩壓力，無時無刻恃惡，只會有反效果。
十大惡人
a.蘇施黃：不論電台電視都聽到佢鬧人，有傳佢鬧走女助手，但越鬧越多觀眾睇。
b.李兆基：《古惑仔》系列中飾演江湖大佬「基哥」，擔住口煙個惡樣最深入民心。
c.黃光亮：拍戲無乜好人角色做，喺《監獄風雲》做監躉叫「儍標」，惡到出汁。
d.吳志雄：《古惑仔》系列做黑社會頭目，樣夠霸氣，《黑獄斷腸歌》中飾演「狗哥」惡到飛天。
e.陳惠敏：《黑社會.com》中飾演「銘哥」眼神有力識打拳，扮演兇狠大佬最維肖維妙。
f.黃毓民：說話狠辣喉沙沙，剛成為立法會議員，惡到掟蕉，你話惡唔惡嘞？
g.成奎安：《監獄風雲》嘅「大儍」最為人熟悉，近年做咗西貢南圍村村長。
惡人教室
唔係惡人底，要你喺適當時候發惡，唔多唔少都要靠演技，無記專做惡人角色三大穩膽──王俊棠、鄭家生同黃文標教你點樣發惡，學嘢嘞。
第一課：睩大對眼喪睥（h）
《陀槍師姐》飾演「聶世官」嘅王俊棠大大隻，唔出聲已經夠氣勢，佢話：「惡唔使出聲，靠眼神。」無錯，眼睛曉說話，所以能夠用眼神話畀人知：「我唔妥你！」叫佢示範用眼神兇人，唔使5秒，我已經驚驚嗌投降。「眼神要堅定，話畀人知你想要乜，要先下手為強，如果你唔想同呢個人再有乜瓜葛，唔怕硬淨啲，唔使畀面佢。」會唔會故意鬧交發惡舒壓？「唔會，鬧人會上癮，我信相由心生，成日鬧人性格實差。」都啱嘅，有壓力應該搵出來源，解決到根本問題，壓力自然消失。
第二課：粗聲粗氣靠嚇（i）
扮演惡人角色多年嘅鄭家生，不論古裝時裝都做惡人，如《秀才遇着兵》的「汪大虎」，直言發惡絕對靠演技：「好似做戲咁，你認為需要發惡嘅時候，就將佢演繹出嚟，唔使乜嘢肢體動作㗎，神情語氣做得惡已經好夠，如果你本身語氣腍善，點惡都無用。」同一句說話，唔同語氣就帶嚟南轅北轍嘅效果，「係呀，根本就係做緊戲。」鄭家生話人年紀大咗，相貌都會慈祥啲，開始唔會淨係做惡人角色。樣惡有無好處呢？「梗係做靚仔好啦，起碼可以擔正，有時喺街，見到唔少小生俾人唔禮貌咁指指點點，我就一定唔會，我望一望，佢哋都掉頭走啦。」又一鐵證，樣惡，真係無咁易俾人恰。
第三課：學人嗌大交(j)
在《天機算》飾演惡霸的黃文標，齋睇樣好惡，聽埋佢講嘢，先發覺佢超Nice。「多啲留意人嗌交，記住發惡大概有乜表情，到真正有需要就演繹番出嚟。人有影像記憶，記住人點發惡，好過慢慢學。」樣惡真係唔會俾人恰？「梗係少啲人恰啦，起碼唔敢搵你笨先，不過壞處一樣有。」例如呢？「例如喺街見到得意嘅小朋友，我撩吓佢，佢多數係喊，識新朋友，個樣太惡，會無咁快接受你。」未留鬍鬚前，佢有機會做警察角色，留鬚後即變惡人，「留咗鬚個樣真係惡啲㗎！」
惡人選舉大儍SureWin
惡人又點止以上三位，邊個係港人眼中嘅經典惡人？順便問埋樣惡有乜好處壞處。
左起Matt：「毓民，飛蕉好有火。個樣生得惡唔會俾人打，無人敢撩你。」Winnie：「成奎安，佢個樣好惡，不過樣惡會嚇走異性。」Peter：「成奎安，太深入民心啦。樣惡出街型啲，但會成日俾警察查身份證。」
左起Cynthia：「黃光亮，做戲真係好惡。唔知樣惡嘅人諗乜，好得人驚。」Alison：「大儍。有惡樣，啲人會聽你話多啲。」Elaine：「大儍。樣惡有氣勢夠壓台，不過好難識朋友，有乜衰嘢都關你事咁。」
馬小姐：「阿蘇，成日鬧人，樣惡唔會咁易俾人恰。」葉先生：「黃光亮，眼神好惡。」
惡人惡相
成日話相由心生，真正惡人有樣睇，堅定流？堅過石堅！睇樣當然要睇相啦，麥玲玲師傅話，惡人惡相有以下四點特質：
1.眉粗、頭髮硬：不論男女，都會較有男子氣概，多數有對關刀眉，殺氣大。
2.三白、四白眼：心胸狹窄較小器，心地無咁仁慈，經常目露兇光。
3.顴骨高、鼻樑直：顴骨主權力，顴骨生得高，為人鍾意話晒事；鼻樑直，為人主觀，唔鍾意聽人意見。
4.嘴翹、哨牙：呢類人唔嘈唔安樂，特別鍾意嗌交，成日搵人撩交嗌。
