港股前日大跌1602點，昨日則勁彈1580點，收報12596，走勢夠晒戲劇化，兼且玩殘人。以昨日大部份主力藍籌及國企股升幅計，如果散戶前日在最悲慘時段夠膽撈貨，短炒賬面應獲利不俗。
港股雖然大升，但內房股不但未有跟隨，部份更未能止瀉，內房股走勢唔跟大市，內在的原因值得散戶深究。其中負債比率達130%、一度被傳無力償還貸款的富力地產（2777），雖然管理層出來澄清，但昨日股價曾低見2.43元，惟大市狂升過千點後，總算幫到些少忙，未致跌穿年內低位2.30元，之後略見反彈，但仍大跌12.6%，收3.19元。
內房股咪亂掂
咁多股份狂升，內房股卻唔跟，或有散戶認為可炒落後。不過，股海爆升，而該等股份卻唔跟，市場智慧點會有錯，內房股似乎存在唔少隱憂，一時間好難令投資者恢復信心，博反彈揀強勢股，唔好亂咁炒落後。
方星俠