港股噚日大反彈，午後升幅擴大，恒指大升1580點，重上12000點大關，幾乎收復上日失地，H指亦大升692點，大市暫時技術反彈，但會再試多次底，到確認中期跌浪到底後，才部署入市。
基金洗倉行動未完，噚日下跌正股仍超過350隻，內房股續係重災區，中國海外（688）早段一度插到落6元關口，大跌20%，午後雖跟市回升，但始終都係以跌市收場。富力地產（2777）因債重而繼續被糟質，最低插到落2.43元，大跌33.4%，收市守穩3元大關，仍跌12.6%，係表現最差嘅內房股，但只要捱得過呢一關，到銀根冇咁緊之時，又會變番一條好漢。
六行三保之中，建行（939）同中國人壽（2628）最勁，建行高收3.23元，大升0.61元，升幅23.2%，成交仲大增到12.9億股，前日跌0.28元，噚日收復失地有突，好強勢。
國壽最高搶上19.72元，回收19.02元，升2.32元，升幅13.9%，成交夠晒熾熱，有成4億股轉手，總值74億元，高踞大成交榜首位。至於平保（2318）同財險（2328），升幅都只係8%左右。
建行同國壽昨日強勢畢呈，係可優先選取博反彈的大藍籌，可趁調整時吸入。
即使減股息仍屬吸引
滙控（005）亦有強者本色，前日大跌13元，低收75元，噚日大升15元，高收90元，唔單止收復失地，仲有進賬。滙控原本成開85元多，但U盤搶上90元，仲成交1340多萬股，超過全日成交21%，有大盤大手扯吸，而且明畀多6000幾萬元，必有後着，亦可趁回調時吸納。
在去年11月開始嘅大跌市中，滙控一直係大強勢股，到近日始出現崩圍式下跌，短短兩日，大跌25%，通常強勢股最後一跌，就係大市到底之時，今次應唔會例外。
大摩唱淡滙控，睇75元，唔使幾日就到價，而預測明年股息會減半，則要日後分曉。在今次金融海嘯中，滙控財務狀況係國際同業中較為穩健的一家，未來業績難免出現倒退，但影響程度會比同業為小，即使派息減少，相信仍會有5至6厘，可趁低吸入作長線投資。
郭兆誠